ZALEN December 23, 2025: Tourism Department leh Mark Events-te tangkawp buatsaihin vawiin khan Chanmari atanga Lammual thleng Christmas Parade neih a ni a, Chief Minister Lalduhoma leh Tourism Minister Lalnghinglova Hmarte chuan he Parade hi an ho a ni.

Mipui thahnem tak fuan khawmna Christmas Parade-ah hian Venghnuai Kohhran Pavalai Pawlte chuan rimawi tumin, Mizoram Cosplay Organisation-te’n thuam mak mawi leh danglam tak takte an pholang a. Art & Culture Department hnuaia Institute of Music & Fine Arts atanga zirchhuakte’n Mizo thuam chi hrang hrang entir bawkin, Mizoram Down Syndrome Association-te pawh he Parade-ah hian an tel a ni.

Chief Minister Lalduhoma-te chhungkua chuan Zarkawt kawn atangin Christmas Parade hi telpuiin hma an hruai a. Tourism Minister Lalnghinglova Hmar leh department hotute pawh an tel a. No Vehicle Zone chhimtu mipuite chibai buk phei zelin, Lammualah an lutkhawm a. Christmas Carol Concert leh Winter Festival 2025 kharna hun an hmang nghal a ni.

Christmas Parade-ah hian Best Costume Award siam a ni a, lawmman hian Rs. 5000/- a keng tel a. Mari & Josepha cosplay-tu Lalrinnunga leh Rebek Lalremruati-te'n an dawng a ni.