ZALEN Aizawl 8, 2026: ZPM Media & Publicity Dept. Chairman Minister B. Lalchhanzova chuan Delhi atanga rawn haw hlim Chief Minister Lalduhoma chu a hmalâkna ropui an tih avangin vawiin tlai 3:30 khan Mizoram Legislative Assembly House Recess Room-ah Tawlhlohpuan a lo bah tir.

ZPM Media & Publicity Dept. chuan Chief Minister chu Parliament-a dan siam danglam tum mêk; FCRA chu Kristian mipuite tâna a that lohna te MKHC leh CCM te nena Union Home Minister Amit Shah an hmu leh an hmalâkna a ropui an tih avangin Chief Minister Lalduhoma chu Tawlhlohpuan an bahtir tih an sawi.

ZPM Media & Publicity Dept. Chairman B. Lalchhanzova chuan Tawhlohpuan an bahtir chhan sawiin, "Kan Chief Minister hi vawiinah a lo haw dawn avangin MNF unauten CM Bangla gate bulah Pawndum nen an lo nghâk a, keini pawhin Tawlhlohpuan hlan tumin kan ngaichâng bawk. Mahse kar kalta lama programme tihfel tawh avangin MLA Conference Hall lamah chawhnu dar 3.30 khan Social Welfare, Women & CDD huaihawtin Banakaih CM Special programme leh Certificate leh GIA to Accredited Drugs Treatment Certificate semnaah khuallian a lo ni a. Chuvangin kan pan chilh ta a ni," a ti.

B. Lalchhanzova chuan, "August ni 6-ah kan Chief Minister Pu Lalduhoma, Council of Churches in Mizoram, (CCM) General Secretary Rev. Lalhmangaiha leh Mizoram Kohhran Hruaitute Committee (MKHC) Secretary Rev. Lallawmthanga te New Delhi kalin, Parliament House-ah Union Home Minister Amit Shah an hmu a. FCRA Mizoram tân a him tawk lohna te thlenin 'memorandum' an thehlut a ni. Hemi avang hian Amit Shah hian an thil thlena pawimawhtak 'Retrospective' FCRA awm hma leh a bawra 'registration' te an tih tel loh thute sawiin, kar leha Parliament thutkhawm neih hmain an thu thlen dangte a lo zirchiang dawn tih a sawi a, kan lawm em em a ni," tiin Kristian te hlauhthawn FCRA chungchanga Chief Minister te hmalakna chu fak a phu hle a ti.

FCRA chungchanga Chief Minister Lalduhoma leh ZPM party hmalakna sawiin, kar hmasa lama Kawrthah North V/C programme-ah CM hian, "Kristian mipuite tâna him lovah chuan kan dodal zel dawn," a tih thu a sawi.

"ZPM PAC Extended Committee chuan CM Bangla-ah August ni 5, 2025 khan FCRA chungchang kan ngaihtuah tawh a. Kan duhdana thil kan tih chu kan MP pahnihten nghet takin kan vuan ang a, kan dinna a nih loh chuan FCRA hi Parliament House-ah kan 'pass' pui lo mai ang," tiin ZPM Media Chairman chuan ZPM party dinna a sawi. 

Zoram mipuite hian Chief Minister-in FCRA-a a hmalakna leh ZPM party hmalakna hria se a duh thu sawiin, B. Lalchhanzova chuan Chief Minister Lalduhoma chhuanawm êm avangin Tawlhlohpuan bantir a ni, a ti a ni.