ZALEN December 9, 2025: MPCC Spokesperson Lalbiakzama, MPS (Rtd) chuan 5.12.2025 ah CM zahawmtak-in Saipum-a H.S.A Khawmpui a hmanpuina thu a sawi chungchang sawiin tunhma hun harsa lo paltlang tawh te kha theihnghilh lo in inzir nan hman a tha in a tul a. Mahse thumuhnu kaitho zawng leh Mizote inkara rilru intih nat sak thei zawnga belhchian dawl lem lo thusawi hi chu sim a tan a tha khawp mai a ti.

Lalbiakzama chuan 1991/92 HPC te movement vanglai khan Saipum khua Saiphai a tih luihna nen khawm tum an ni a tih hi thu belhchian dawl lo a ni. Tih luih na nilo in a duh tan duh thlan theihna siam a ni a, sawrkar khan rangva leh pawisa thlengin pek a in huam a, Saipum mai ni lo in Sakawrdai lam ah te pawh he rawtna hi siam a ni. Anmahni duhthlan na in chhungkaw engemaw zat chu he rawtna ang hian an pemkhawm ni a hriat a ni.

MPCC Spokesperson chuan, "HPC Area ah curfew puan thin khan chhunlam a huam ngailo a, zan inkhawm pawh kha hmun tamtak ah chuan phalsak an ni. Tin, heng hun lai a tuna kan CM in a kal dawnah Lt.Governor curfew min hlih sak turin ka ngen a tih hi a mak khawp mai. Mizoram State kan ni kha 1987 ani a, khami hnu kha chuan Lt. Governor kan nei tawh si lo," a ti.

CM-in in vauna lehkha thehdarh chungchang sawiin, "MLA inthlan 1993 (?) khan lehkha in vauna te thehdarh chu ani ngei mai a, mahse a thehdarh tu kan nauten an han chhui chian khan MNF Block hruaitute leh an unit te tih ani tih pawh kan chhui chhuak a ni. Block President hi khatih lai khan Kohhran upa a ni nghe nghe a..’ Upa tih ah chuan a mawilo mange..’ kan tih khum hial reng a nih kha. Heng thilthleng report te hi tih chhiat a la nih loh chuan kan CID ( SB ) ten an file hlui ah an la kawltha ang," a ti.

"Tin, HPC te kan CM in ZALENNA sual anga a sawi kha a hriatsual a nih hmel, Autonomous District Council an ngen (Demand) a ni zawk," a ti bawk.

Chief Minister-in HPC leh Mizoram sawrkar inremnaah inrawlh anga a insawi chungchangah Lalbiakzama chuan, "Hetia HPC ‘D’ leh Mizoram sawrkar inbiakna ah hian Mizoram aiawh Team Leader ah ruat ka ni a. Khatia kan inbiak chhung zawng khan tuna kan CM zahawmtak Pu Lalduhoma hian vawikhat mah rawn inrawlhna a neih ka hre lo a, amah leh a party hian engmah an rawn nawrpui awm pawh ka hre lo. Kan inbiakna tum khat, engtik ber kha nge ka chiangta lo a, HPC ‘D’ palaite khan Pu Lalmuanpuia Punte hi an spokesperson anga a tel ve phalsak turin min rawn dil a, kan remtih sak," a ti.

MPCC Spokesperson chuan Saipum khua a CM in HPC ‘D’ te nen inemna zawngin an inbe mek a rawn ti leh ta mai hian a barakhaih deuh tih a sawi a, heng ho hian demand an neih thu a hriat loh bakah Mizoram chhungah buaina an thlen lo a, hetianga CM-in thu tak hla taka thil a kalpui a nih chuan tuna Lalhmingthang Sanate leh a hote mi 10 rual vel te remna siampui an tum a nih chuan Rehabilitation sum beisei in an rawn in sawi tam belh khawp ang, a ti bawk.