Chief Minister Lal Thanhawla chuan January 18, 2018 (Ningani) kaltaa Mizoram Ministerial Service Association khawmpui a hmanpuina ah sawrkar hnathawkte chu mipui rawngbawltu an nih angin mipui tan leh anmahni dawrtute tan dawr nuam taka awm tur te, rinawmna, dikna, taimakna bakah chhiatnia intawiawm kawngah pawh chintawk nei deuh turin a sawm a. Chief Minister thusawi hi sawrkar hnathawkte hian inenfiah nana hmangin zawm se a duhawm hle. Sawrkar chuan a hnathawkte zawm turin pisa kai hun a siam a, state dangte ngaihtuahin pisa chawlh pawh a tam a, hei hi mi thenkhat phei chuan an sawisel hial a ni. Pisa kai hun dar bituk pawh siamin thlasik ah zing dar 9:30 atanga tlai dar 4 leh nipui ah zing dar 9 atanga tlai dar 5 te a bituk tlangpui a. Mahse sawrkar hun bituk hi a hnathawk tam zawk hi chuan an zawm lem lo niin a lang. Zing dar 9 pisa tan hun a ni chungin office tam ber hi chu dar 10 hnu lamah chauh an dawr theih a, chutiang bawkin tlai dar 5 office ban hun pawh nise dar 5 awm thleng peih chu an tam lo hle. A hun dik taka kal leh bang thin te chu mi phutkhat deuh ah te kan ngai lek lek mai. Hun vawndik te hi kan tih tur a ni a, office tlai reng mai te, a hun hmaa ban ringawt zel te hi eirukna chi khat a ni. Hei mai bakah Chief Minister sawi ang deuhin office hnathawh hun chhunga pawi pang dang inneihna a kal, mitthi vui, lungphun, birthday lawm leh a dang kan ngah lutuk pawh hi tihtawp a tha. Heng kan sawi hrang hrangah te hian kan kal dawn anih pawhin kan hnathawh tibuai lovin hun kan hmang tur a ni a, a tul ngang anih chuan chawlh pawh lak ngam mai a tha ang. Hawihhawmna kawngah pawh sawrkar hnathawkte hi tun ai hian tan la zual se a duhawm hle mai. Hnathawk thenkhat, anmahni dawrtute be tha duh mang lote an awm leh zauh thin. Heng mite hian an rawngbawlsak leh hlawh petu mipuite an zah lo tihna a ni a, hemi kawngah pawh hian hmasawn kan ngai hle. A chunga tarlan bak pawh sawi tur tam tak a la awm ang. Mahse heti chin ringawt pawh hi zawm tha ila Zoram hian nasa takin hma a sawn ngei ang. Chuvangin Chief Minister thusawi hi sawrkar hnathawkte hian inenfiah nana hmangin zawm hram tum teh se.