Aizawl October 9, 2024 : Mizoram Pradesh Youth Congress Committee chuan thuchhuah siamin Chief Minister Lalduhoma mipat hmeichhiatna lam hawia video call thin te zawng zawng sawrkarin chhui chhuak vat rawh se, an ti.

MPYCC chuan, "Ni 7.10.2024 (Thawhtanni) a MJA leh Mizoram Police tangkawpin 'Seminar On Cyber Crime' Serchhip Press Club-a neihah bialtu MLA leh Chief Minister ni bawk Pu Lalduhoma chuan hmeichhe hrang hrang atangin Sextortion video call vawi 100 chuang ka dawng tawh a, nizan pawh khan vawi engemaw zat ka dawng a, ka block char char a, min rawn call tute hi hmeichhia vek an ni," a ti.

"Heng hmeichhia te hi an thlalak (picture) atang chuan an nalh thei em em a, a tak an nih leh nih loh chu ka hre lo, ka block tawh zawng zawng hi za chuang an ni tawh," tih a sawi.

Congress thalai chuan he thil hi sawrkar mualphona leh Kohhran beng ti kham thei thil tenawm leh rapthlak takah an ngai a. "Vawi 100 chuang Sextortion Video Call dawng tur chuan Chief Minister hian a lo REPLY ve zauh zauh thin em ni," tih hi Congress thalai chuan a zawt a ni.

Congress thalai chuan hetianga Chief Minister Lalduhoma'n mipat hmeichhiatna lam hawia invauna leh thlemna a tawk hi khawvel ram hruaitu dang chunga thleng ngai lo a nih avangin chhui chhuak ngei turin Mizoram Sawrkar a phut a ni.

Sex-tor-tion hi website/pornography/ sexlink lam lut thin lo te leh hmeh tur hmet thin lo tan phei chuan an sex-tor-tion video call hi an tawng mawhin hetiang buaina hi an tawk ngai lo. Chief Minister hian amah in sawi ropui a tumna lamah in sawi theih nan, amah beitute ruahman ni awm ten a sawi zui bawk a. A zia lovin a zahthlak takzet a ni, an ti bawk.

MPYCC chuan, "Chief Minister hi hmeichhia nena sawizawm a ni fo mai a. Zanlaiah nula nena Whatsaap message-a inbiak te, puipunna hmuna hmeichhia nena lam fo leh khawi lo kalna hmuna hmeichhe kut lo hum vung vung hmuh tur leh hriat tur a awm fo leh KS Market that zia a sawi te phei hi chu Mizoram, Kristian state-a thil thlengah chuan a rapthlak takzet. MNF sawrkar ah khan mipat hmeichhiatna lam hawia ngaih theih sawi tur a awm fo bawk," an ti.

Congress thalai chuan hetianga sawrkarna chelhtute leh mipat hmeichhiatna inzawm tlat avang hian Mizoramin chhiatna hrang hrang a tawh phah niin an ngai a. Chief Minister Lalduhoma Video hmanga mipat hmeichhiatna lam hawia betu te zawng zawng hi sawrkarin chhui chhuak ngei turin ZPM sawrkar an phut bawk a ni.