Aizawl: Myanmar Chin Hills Chief Minister Lianluaia leh a thawhpuite chuan Ningani kalta khan Lawngtlai district a India leh Myanmar insumdawntawnna tur hmun Saisih chhuah tlawhin lei dawhna hmun tur a enfiah bawk. Chin Hills Chief Minister hi ramri ah AH & Vety Minister C.Ngunlianchunga, Parliamentary Secretary H.Zothangliana leh Joseph Lalhlimpuia bakah sawrkar mi pawimawh ten an lo dawngsawng. Chin Hills Chief Minister Lianluaia chuan Mynmar ram chu Democracy a nih tawh avangin Mizo te tan inpawhna tha zawk a awm thei tawh dawn nia sawiin border trade hawn a nih hunah chuan chakkhai awlsam zawkin kan in lam tawn thei tawh dawn a ni, a ti. Mizoram sawrkar aiawha thu sawitu Parliamentary Secretary Joseph Lalhlimpuia chuan Chin Hills Chief Minister in Saisih a tlawh chu ram pahnih kan in chhawr tawnna tur atana rahbi pawimawh tak a ni tiin ruahmanna peih a nih hun chuan Myanmar kaltlangin India ram bungruate khawchhak lamah hralh a ni dawn a, chu chu Mizo mipui ten nasa takin an hlawkpui dawn niin a sawi bawk.