ZALEN Feb 16, 2026: Myanmar ram Salachhuah a bungraw daha kal Lalramsanga, Lawngtlai AOC Veng, February ni 12 atanga chin hriat loh chu nimin khan a ruang hmuh a ni a, hemi vang hian Central Young Lai Association (CYLA) chuan Myanmar ramri a khar rih.

Lalramsanga (37)s/o Lalremsanga, Lawngtlai AOC veng a cheng hi kar liam ta Ningani, February ni 12 khan, Pickup MZ-07 A-2143 hmangin Salachhuah, Myanmar- ah dawr bungrua dah turin a kal a, a bungraw dah hi Salachhuah a thlenpui ngei tih hriat a ni a, hemi zan dar 9 atang hian a chin hriat a ni ta lo a ni.

Central YLA te hriattir an nih hnu-ah, Central YLA leh MTP Gen.Hqrs Siaha hruaitute chu February ni 14 zan dar 7:30 khan Tuipui Ferry-ah thukhawm in Lalramsanga- chanchin ngaihven dan turte an sawiho a, chanchin hriatchian a nih hma chuan Myanmar lama bungraw kal tur reng reng nimin Pathianni chawhnu dar 3 atang khan block vek nise an ti bawk.

Lalramsanga chanchin ngaihven a Lawngtlai District Pickup Association leh Central YLA hruaitute AOC Venga an awmkhawm laiin, Salalui leh Chhimtuipui infinna lai, India leh Myanmar ramri lui-ah ruang hmuh a nih thu an dawng a, finfiah turin MTP lam chuan lamkal an intir a, finfiah a nih hnuah Lalramsanga ruang hi MTP Gen. Hqrs Hruaitute hian Salachhuah atangin an la a, Lawngtlai atangin Central YLA hruaitu te leh Pickup Association member thahnem tak an kal bawk a, MTP te nen an intawhna hmunah ruang hi an inhlan chhawng a ni. Lalramsanga hi engvanga thi nge hriat a la ni rih lo.

Hetiang boruak avang hian Myanmar lama bungraw phurh luh chu Lawngtlai District Pickup Association leh Central YLA hmalakna in block chhunzawm a ni.

#ZalenNews