February 20, 2023; Chin State Chief Minister Salai Lian Luai chuan, Myanmar ram buai vanga raltlante'n Mizoram sawrkar leh Mizoram mipui hnenah lo chuan tlukluhna leh pangchanna hmun dang an nei lo tih sawiin, "Hmangaihna leh khawngaihna nen min lo tuamhlawm lo ula chuan, kan dinhmun tur leh kan hmakhua tur hi dawn ngam pawh a ni lo," a ti.

Zanin a Chin National Day vawi 75 na, Vanapa Hall, Aizawl a hmanna ah thusawiin, Salai Lian Luai chuan, "Mizoram sawrkar leh NGO te, kohhran leh khawtlang mipuiin raltlante nasa takin min lo buaipui a, min lo enkawl dan zozai hi kan lawm takzet a, kan lawmthu hi sawi lo in kan awm thei lo a ni," a ti.

Salai Lian Luai chuan raltlan zingah ruihhlo lalut thin an awm chu pawi an tih thu leh Mizoram sawrkar leh mipuite hnenah ngaihdamna leh hriatthiamna an ngen tih sawi bawkin, anni lam pawhin na taka an dodal leh an khap a nih thu a sawi.

"Kan ram buaina in eng chen nge a awh dawn kan hre lo, Burma sipaite hi hneha an awm ngei hi kan ring a, hneha an awm chuan kan duh ber chu sawrkar dik tak din a ni," ti bawkin, "Chumi hunah chuan unau dik tak kan nih angin, lungngaihni leh lawmni, sumdawnna leh Pathian rawngbawlna kawngah te nasa takin rawng kan bawl tlang thei ang tih kan beisei a ni," a ti bawk.