Aizawl: Myanmar a zo hnahthlak hnam hrang hrang Mizo, Paite, Pawi leh a dang te an insuihkhawm theihnan Chin Unity Forum din a ni a, kumin chhung ngeiin hnam hrang hrang aiawhte meeting neih hman tum a ni. Tun hnaia Kalymyo tlawhtu chanchinbumi thenkhatte hnenah he thu hi sawiin Tahan khuaa Mizo hruaitute chuan Myanmar-a Mizo awm zingah Hualngo leh Lusei an inthenhrang tih sawiin zirlaibu pawh chi hnih siam a nih avangin naupangten harsatna an tawk tih an sawi a. Mizote inngeih tlang taka an khawsakho theihna atan mai bakah Zo hnahthlak hnam peng hrang hrang Pawi, Paite, Jahau leh a dangte lung rual taka an thawhho theihnan Chin Unity Forum an din tih an sawi. Tahan khawpui, Golden Butterfly Hotel-a MJA nena an inkawmnaah ruihhlo chung changah Chin Unity Forum hruaitute chuan ruihhlo zuar thinte chu an huat thu sawiin ruihhlo zuar an mante hian an hming leh khaw lem an sawi thin tih an sawi a. Ruihhlo chu a chahtu an awm avanga kengtu awm nia an hriat thu sawiin, “A kengtu leh a chahtu hi hrem nise kan duh a. Police leh Excise zingah pawh sum la leh promotion nana hmang an awm niin kan hria a, hei hian kan rilru a tina hle a ni,” an ti bawk.