ZALEN November 13, 2024 : Cocoa chin dan zirnna 'Workshop on Cocoa Cultivation' hmanpuitu State Planning Board Vice Chairman Dr. Kenneth Chawngliana chuan huan hmun nghet neih a pawimawh tawh a, chumi atan Cocoa chu thei tha tak tur leh hralhna tur pawh tha tur a ni, a ti.

Dr. Kenneth-a chuan thlai chin tur a zirin hmun thlan thiam a ngai a ti a, tuna kuthnathawk hma kan lak dan chu ram a la hlawk tawk lo a ti a. Ration Car var, a hring a sen tih vel hi kan buaina a la ni a, chuvangin kan hnathawh kalpui dan hi kan kalsan hret hret a ngai a ni. Chumi atan chuan Cocoa chan hi thil tha tak tur a ni a, a kumhlun em em hi a thatna a ni, a ti.

Cocoa chin dan zirnna Workshop hi ni 13.11.2024 hian Horticulture Conference Hall, Directorate of Horticulture ah neih a ni. Mizoram District rang hrang sawm atangin farmers thlanbik mi 50 velin he workshop hi an chhim. Mizoram pawn atanga Cocoa lama mithiam sawmbik Tamil Nadu, Kerala leh Assam atanga lo kal ten farmers te zirtírna hun an nei a ni.

Cocoa (Chocolate tree) hi plantation crop pawimawh tak niin Mizoramah lian tham taka kalpui a la ni lo. Cocoa scheme bik hran pawh a awm lo chungin Horticulture Department hmalakna in kum 2022 leh 2023 chhung khan district pahnih Kolasib leh Mamit district ah farmers 138 te chin tan tir niin, a vaiin Cocoa tiak 15,000 ching tir in bu tan a ni. Heng atang hian 50% aia tam hì tha takin nung mek a chhinchhiah a ni

Cocoa in chin atanga kum thumah a rah a seng tan theih a, kum 5 ah hlawk tham takin a thar theih a ni. Cocoa hi hmun hlim leh ngaw buk karah pawh tha taka thar theih a nih avangin thlai chin pawlh Mixed Cropping ah rubber leh spices nen leh Intercropping ah plantation crop dang Kuhva, Oil palm leh Coconut te nen chin pawlh thin a ni. Cocoa hi hmun sang lutuk lo (<1200 m MSE), lum zawng 15-35 °C leh ruahtui 100-200 cm tlakna hmunah a chin hlawhtlin theih avangin Mizoram district dangah pawh chínna hmun zauh zel tura hmalak mek a ni.