ZALEN December 22, 2025: Winter Festival 2025 leh Christmas denchhenin naktuk hian Government Mizo High School step peng, Chanmari atangin Christmas Costume parade huaihawt a ni dawn a, he hunah hian Tourism department chuan mipui tu pawh tel turin an sawm a, Inchei danglam kher lo tan pawh tel theih vek a ni, an ti.

He hun hi Mizoram sawrkara Tourism Department huaihawt tur a ni a, December 23 hi Pathianni a nih loh chuan he ni-ah hi kum tina neih tawh tura ruahmanna siam a ni. Mizoram Tourism calendar-a chuang reng tawh tur, state leh ram dang khualzin ten Mizoram an rawn tlawh chak theihna tura ruahmanna siam a ni a, hei vang hian tun tum Christmas Costume parade pawh hi a tam thei ang ber tel turin Tourism Department chuan mipui an sawm.

Tel tur hian mi zawng zawng an sawm rualin sawm bik erawh an nei a, Vohbik te leh Cos Play lama mi bik te an nei a, anni hi a hmun lailum luahtu tur an ni. Anni ho bakah Christmas puala khuangtlir carol lama sulhnu nei tha Venghnuai-a Venghnuai Kohhran pavalai te chu he ni atana langsar tura ngaih an ni a, anni hi mi lawm hlawh tura beisei an nih thu Tourism Minister chuan a sawi.

Costume parade hi chhun dar 12:00 a tan tur a ni a, Chanmari leh Lammual inkar lun lai-ah hun hman thin tur a ni a, hei hi Gospel United te chuan an kaihruai dawn a, tlai dar 3:00-ah Christmas carol service lammual-ah hman a ni dawn a ni.