Western and Southern Open khelh mekah Jessica Pegula-i lakah Emma Raducanu a chak zo lo a, tihian nikum US open a champion hnuah Raducanu hi match thum a chak loh zawnna a ni. 

British number one hian a tirah khel tha viau mah se seeded pasarihna Jessica Pegula lakah a thiamna a phochhuak zo lo a, round hniam lama veteran Serena Williams leh Victoria Azarenka-i henhtu Raducanu hi last 16-ah 7-5 6-4 in Pegula-i lakah a tlawm ve thung a ni. 

US Open chu August ni 29 khian New York khawpuiah khelh tan a ni dawn a, he hunah hian kum 19 a upa hian nikum lama a lo champion tawhna US Open nomawi chu hum a tum ruh hle a ni. 

Mipa lamah British mi seeded pakua-na Cameron Norrie chuan American rawlthar Ben Shelton chu 6-0 6-2 a hnehin quarter-final a in vaw kai bawk. British mipa number one Norrie hian round hmasa lamah Andy Murray chu minute 57 chhung lekin a hneh a, quarter-final ah hian Spain mi seeded pathumna Carlos Alcaraz a hmachhawn ang. 

Inkhelh dangah top seed Iga Swiatek chu round thumnaah American Madison Keys lakah a tlawm a, French Open champion Swiatek,kum 21 hi 6-3 6-1 laiin Madison Keys-i hian a hneh a ni. A career-a world number one a hnehna hmasa ber a ni.

Poland nula Swiatek hi tun hnai match riat a khelhah tum li zet a tlawm tawh a, match 37 zet hneh loh nei lo a a kal tluang lai chu Wimbledon-ah khan tih tawp a ni bawk a nih kha. Keys hian quarter-final ah Elena Rybakina a hmachhawn ang. Wimbledon champion hian American Alison Riske-Amritraj chu 6-2 6-4 in a vaw tla a ni.

Czech Petra Kvitova chuan 6-1 4-6 6-0 in Tunisia mi Wimbledon runner-up Ons Jabeur a hneh a, Estonian seeded pahnihna Anett Kontaveit pawh Chinese Zhang Shuai'n 2-6 6-4 6-4 in a hneh ve bawk. 

Mipa lamah world number one Daniil Medvedev chuan Canadian Denis Shapovalov chu 7-5 7-5 a hnehin quarter-final a lut a, a ni pawh hian a US Open title chu hum a tum ngeiin a rinawm.