Premier League season kal meka ‘inkhel pawimawh ber’ tia sawi ngamah Manchester City-in Arsenal chu Nilaini zan hian 4-1 zetin nan hneh a, an awmna la insawn phah lo mah se an dinhmun erawh a inthlau ta deuh.

City hi pahnihnaah la awmin point hnihin Arsenal la phak lo ngei mah se khelh hniha an khelh tlem zawk miau avang leh khelh hmabak a tlem tawh bawk si avangin tunah chuan champion thawkin an thaw ngam ta a, manager Pep Guardiola pawhin nomawi lak chu ‘an kuta awm’ a nih thu a sawi ngam ta bawk.

Etihad Stadium-a inkhelah Gunners hian Erling Haaland leh Kevin de Bruyne inkawp an ngam lo a ni ber mai a. Belgian midfielder hian Norwegian striker palian thawh rah atangin first leh second half-ah goal a thun a, chawlhlawk hma chiaha John Stones-a’n tauh lutin hun tawp dawnah Haaland-a’n a thun bawk.

Premier League hmahruaitu tan Rob Holding chuan si thum an phurh laiin goal khat thun ve mah se Mikel Arteta leh a naute tan chhandamna a tling phak lo.

He inkhel result avanga Arsenal tan nomawi a hlat tak duai laiin City tan erawh ban phakah a inchhawp ta a. “Kan kuta a awm lai hian kan hmang tangkai tur a ni,” a ti.

Ni e, season hman ral tawh zawng zawng deuhthaw kha ‘Arsenal kutah nomawi a awm’ ti ila a sual lo vang, tunah erawh an kutah a awm ve ta a. 

“Kan focus hi kan hloh a thiang lo, tunah chuan kan kutah a awm tawh,” tiin Guardiola chuan a sawi.

“Kan tum hi kan hlen duh tak tak a nih chuan kan hmabak inkhel pathum hian a hril dawn a, a tak takah chuan Arsenal hnuai kan la ni tho,” a ti a.  “A awlsam dawn lo,” tiin Spanish manager chuan a sawi bawk.

Treble champion nih tum City hian Premier League an ban pha ta thuak a, Champions League-ah semifinal lut tawhin FA Cup-ah final an lut tawh bawk.

Arsenal erawh ‘season leh’ an nghak dawn em tih a chiang ta lo va, khelh hmabak panga an neiha an chak vekin nomawi an la la phak thei dawn nia a inhriat leh hriat loh zawhna chu boss Arteta chuan, “Chutiang chuan kei chuan ka ngai,” a ti a, a la beidawng lo.

Arsenal hi Arsene Wenger-a hova kum 2004-a an champion hnu lamah Premier League nomawi an la la leh lo va, tun season hi la thei tura an in dinhmun a that ber tum a ni a; mahse, Liverpool, West Ham leh Southampton an hnehtawk hnuah an elpui ber an ngam lo zui a, an tan thawk len ngamna chi a ni ta rih lo.