Manchester City boss Pep Guardiola chuan a striker Erling Haaland chu a ke na avangin engtia rei nge a chawlh dawn a sawi thei lo.

Norway striker hi tun season-a Premier League an khelh tawh zawng zawngah inkhel bul a tan vek a; mahse, Pathianni zana Luton Town an tlawh tumin a inlan thei ta lo thung.

A chungchang an zawhnaah Guardiola chuan, “A ke ruhah na a nei,” tiin a chhang.

“Kan khelh hnuhnung bera Aston Villa kan hmachhawn tum khan a na a ti tan tawh a, a inkhel thei dawn ta lo a ni,” tiin Luton an hmachhawn hma lawkin a sawi.

Haaland hi tun season-ah goal 14 thun tawhin thun tam ber a ni mek a, inelna hrang hrangah City tan tun season-ah goal 19 a thun tawh.

“A inhliam chen tur hi ka hre bik lo. Ni tin, chawlhkar tin a dinhmun hi kan ngaichang dawn a ni,” tiin Guardiola hian a sawi bawk.

“A lo luh tirh atang tawhin Erling hi a pawimawh em em a ni tih phat rual a ni lo va. Tun season-ah erawh thil hrang hrang - hliam, hremna leh neuh neuh dang kan tawng tih kan inhria a, kan insiam rem thiam a ngai a ni,” a ti.

City hi Premier League-a inlan hnuhbung vawi lia vawi thum hnehtawk leh chak lo vawi khat an neih hnuah Luton hi an tlawh a ni.