Oct. 17, 2024; Mizo hmeichhia ten eizawnna kawngah bung thar an kai mek zel a, tun dinhmunah city bus conductor-ah mi engemawzat an tang tawh a, 2Wheeler Taxi khalh pawh an thahnem viau tawh.

Aizawl City Bus Owner Association (ACBOA) office atanga ZALEN thudawn danin, an chhinchhiah chinah hmeichhe city bus conductor hi tunhnai deuh atangin an pung a, tuna an chhinchhiah chin chu mi 28 an ni.

Aizawla 2Wheeler Taxi khalha eizawngah pawh hmeichhia an pung chho mek zel bawk a, Aizawl Two Wheeler Taxi Association (ATTA) ah member hmeichhia 70 vel an awm a, chung zingah chuan mi 40 bawr velin regular takin eizawnnan 2Wheeler Taxi an khalh nia thudawn a ni bawk.

Eizawnna kawngah mi taima tan chuan hnathawh tur a tam a, tunlai ah chuan Mizo hmeichhiate'n mipa te thawh tur chauh nia ngaih hna tam tak an thawk chho mek, mipa te ang thoin kawng tam takah theihna leh thiamna pawh an nei tih an lantir mek zel niin a lang.