ZALEN May 27, 2026: State Transport Authority, Mizoram chuan Aizawl khawpui chhunga mipui, Aizawl City bus hmang thinte leh Bus neitute tan awlsam leh awmze nei zawka Pick and Drop kalpui a nih theih nan a hnuaia mi ang hian thuchhuah a siam.

Aizawl City Bus te an stand ah rei tak ding lova, passenger luh leh chhuah hun chhung chiah din tirin, Pick & Drop System chu Sept 2025 atanga Oct 2025 inkar chhung khan enchhinna hlawhtling takin lo kalpui tawh a ni a.

Hemi chungchang hi State Transport Authority Meeting ni 04.02.2026-a neih chuan a ngaihtuah a. Aizawl khawpui chhunga bus a chuang thin te tan a that em avang leh ACBOA lam pawhin kalpui zel tha an tih avangin Pick & Drop System hi Aizawl khawpui chhungah kalpui chhunzawm nise tiin a rel a.

June ni khat, 2026 atanga thu leh awm hma chu Aizawl khawpui chhunga City Bus te chu an stand-ah rei tak ding tawh lovin, passenger luh leh chhuah hun chhung chiah an ding tawh tur a ni a. He thil hi mipui hmakhaw ngaia ruahman a nih ang ngeiin, mipuite pawhin lo zawm a, lo hmang tangkai thin turin an ngen a ni.