Euro 2004-a mak tak maia Greece champion-pui nawlhtu, Otto Rehhegel-a khan kum 1995 daih tawhah khan, “Pawisain goal a thun ngai lo,” a lo ti tawh a.

Tun laia Europe-a club ropui ber berte hi en ta ila, nomawi an lak tam tak hi ‘an lei chhuah’ tia sawi awm ta se, hnial a har fu ang em? A bikin tun hnaia Manchester City hlawhtlinnate hian sawi zui a hlawh a, German coach ropui hian a sawi sual ta em ni ang le?

Online-a German, saptawng, Spanish leh French tawnga statistic leh report rintlak tak tak tichhuaktu, khawvela rintlak ber pawl, Statista chuan kum 2008 atanga an chhutin City hi player lei leh hralhna chhuta an sum sen zat (net transfer spending) tam ber niin an tar lang a, hemi awmzia chu player leina atana an sum hman atanga an hralhna atanga sum an hmuh paih tihna a ni.

Kum 15 chhung hian City-in player lei nana sum an sen atanga an hralhna paiha an sen chu € tlukledingawn 1.45 ($ tluklehdingawn 1.57) zet a ni a, an thenawma mi, Manchester United aiin € maktaduai 200 dawnin an hmang tam zawk a. Russian mi hausa ta ni thin, tuna American pa ta ni ta, Chelsea aiin € maktaduai 300 chuangin an hmang tam bawk.

Manchester club hi Abu Dhabi United Investment Group-in August, 2008 khan an lei a, chairman thar, Khaldoon Al Mubarak-a kaihhruaina hnuaia league table-a a laihawl vela awm thin kha khawvela football powerhouse lian ber pakhatah an insiam tawh a, 2011-12-a a vawi khat nana Premier League nomawi an lak hnuah vawi sarih zet an la tawh.

Heti taka City-in tun hnai kum 10 chuang awrh chhunga hlawhtlinna an chang ta hi ‘sum thiltihtheihna’ tia sawi duh tan a remchang hle a, Emirati neitute hian sumin vur lo se hetiang hi an ni ang em? Sum awm lo se nomawi an lak tam tak hi mi la lai thlirtu zawk an ni mai lo maw? Inhnial theih tak a ni ang.

Hetih mek lai hian German coaching legend King Otto sawi ang deuh hian ‘sum vang a ni ngawt bik lo’ ti duh an awm a nih pawhin dikna chen a awm tih chu City thenawmte chet dan atangin a lang ve tho mai.

Sum hman tam lama City hnuai chiaha awm chu Manchester club tho an ni a. Red Devils hi Sir Alex Ferguson-a’n kum 2013-a a chawlhsan hnuah phei chuan sum insen inzat thuakah an thenawmte an tluk pha lo deuh tih chu kan hre vek a. ‘Sum ringawt a ni bik lo’ a tih ve leh theih tho si mai em?

Statista-in a chhut dan chuan Manchester club pahnih leh Chelsea hnuaiah hian Paris St-German (€ tlukledingawn 1.07), Barcelona (€ makdaduai 825), Arsenal (€ makdaduai 776), Juventus (€ makdaduai 634), AC Milan (€ makdaduai 541), Bayern Munich (€ makdaduai 511) leh Liverpool (€ makdaduai 501) te an awm.