Manchester City chu financial rule bawhchhia nia sawi chungchangah hremna pek an ni reng tawh thu leh thiam lohna an neih loh thu an manager Pep Guardiola chuan a sawi chhuak.

Premier League thuneitute chuan thawhlehni khan City hi an sum leh pai dan vawi 100 chuang lai bawhchhiaah an puh.

City hi Uefa-in Financial Fair Play (FFP) dan bawhchhiat vangin kum hnih chhung European competition-a tel thei lovin Court of Arbitration for Sport (Cas) in hremna a pek chu kum 2020 khan a hlihsak tawh.

Guardiola chuan,"Club lam thiam loh an nei lo tih huai takin a sawi chhuak a, thawhtanni an thu tlukna siam hi Uefa-a thil thleng nen a inang reng a, kan sawisel tawh a ni," a ti.

Sawi zawmin,"Premier League-a team 19 ten mahni in venhim theihna kan neih loh avangin min puh tih hi in hriatthiam a ngai a ni. Mahse, ram nuam taka cheng kan ni a, thiam loh chantir kan nih hma chu tisual neia chhiar kan ni ngai lo hi kan vannei hle a ni, a ti. Insawifiahna hun tak ngial pawh pek kan nilo a, thiamloh min chantir der tawh thung si. Kan dikna hi hailan a la ni ngei ang tih ka ring tlat a ni," a ti.

Premier League lam chuan, City hi dan bawhchhia nia puh chungchangah kum 2009 leh 2018 inkar khan independent commission lamah an thlen a, Premier League title paruk an lak zinga pathum chu he an buai lai hian a huam a ni. 

An chhui tan tirh December 2018 aṭang khan a chhuitute chu an thawhpui tha duh lo hle niin an puh bawk. He commission hian pawisa chawi leh point paih sak bakah Premier League aṭanga hnawhchhuah thlengin hremna a pe thei a ni.

Kum 2008-a Abu Dhabi United Group-in an lei City lam chuan an puhna hian a thawn thu leh mak an tih thu an sawi a, dan bawhchhiatna nei ngei an nih chuan an pawm theih reng thu an sawi bawk. 

Guardiola'n zirtawpni zana news conference a neihnaah an thubuai neih mek chu an mahni ertu an khingpui club-te hekna vang a nih a rin thu a sawi bawk. Hekna a nih tak tak i ring em tia zawhna chu chhangin,"Ring e, Premier League chhung ami ngei an nih ka ring tlat, mahse a chhan erawh ka hre bik lo. CEO-ten an hria ang zawt mai rawh u," a ti. 

Sawi zawmin,"Kan kal danah hian club zawng zawng kan fimkhur tlan a ngai. Thiam loh nei si lova, thiam loh in chantirna in puhna ang hi nakin lawka tawk ve thei reng in ni. Nakin lawkah eng nge thleng dawn tih tuman kan hre lawk si lo. Kan famkim loh tih chu kan pawm a, mahse tuna min puhnaah erawh thiam kan la chang ngei ang," a ti. 

Tun hmain Guardiola hian sum leh pai hman danah City hian dan a bawhchhia nia an puhna chu finfiah a nih ngat chuan City hi a chhuahsan tur thu a lo sawi tawh a ni. Mahse, zirtawpni zanah erawh a club chu chhuahsan a tum loh thu sawi chhuakin,"He hmun hi ka chhuahsan lovang tih ka tiam ngam a che u. Tun hma lam zawng aiin nuam ka tih a zual a ni," a ti. 

Spaniard hian thuneitu lamin City hi Premier League atanga an paih a nih pawhin ngaihtuahawm a nih loh thu a sawiin,"Division hniam zawkah pawh awm ni ila a pawi lo. Kan lo kir leh em em ang, buaina tur a awm lo," a ti.