Aizawl: Aizawl khawpui chhunga private hospital hrang hrang te chuan October, 2014 atanga April, 2017 chhung khan Aizawl Civil Hospital Blood Bank atanga thisen an lak sawngbawlna  man Rs. 103,92,500 an ba chu rulh tir mek an ni. Directorate of Hospital & Medical Education (H&ME) in RTI hmanga Zalen zawhna an chhan danin kum 2014 October thla atanga April, 2017 thlenga Aizawl Civil Hospital Blood Bank-a private hospital ten thisen man (blood processing fee) an bat zat chu Rs. 103,92,500 a ni a, heng zinga Rs 100,88,650 chu hmuh let tawh niin Rs. 2,93,850 ba a la awm. Private hospital thenkhat chuan pe tla mai loin hun engnge maw chen an ba a, hospital 4-in ba an la nei nia thudawn a ni. Thisen man batute hi private hospital 12 niin an bate hi tunhnai maia rul tlate pawh an awm a. Thudawn danin thisen man bat a nih lai hian thisen hi private hospital ten blood bank atangin an la a, hetah hian blood processing fee Rs. 550 chu an pe nghal lo thin. Thisen dawngtu damlo te hian private hospital-te hnenah blood processing fee hi rul mah se hospital te hian blood bank-ah an tlak leh ta lawk lo thin a. Heng ba te hi lo tlingkhawmin cheng nuai za chuang a lo ni ta a ni. H&ME department chuan private hospital te hi an ba te an thing zel a, tunah hian hospital 9-in an ba an pe tla tawh a, pathumin an la pe tla lo a ni. Tuna an ba rul tawh te hi Aizawl Adventist Hospital, Newlife Hospital, Greenwood Hospital, Vaivenga Hospital, BN Hospital, Grace Hospital, Alpha Hospital, Nazareth Hospital leh Aizawl Hospital te an ni a. Thisen man la rul lo te hi Blessino Hospital, Bethany Hospital leh Bethesda Hospital te an ni. Blessino Hospital hian Rs. 2200 bain an la rul lo a, Bethany Hospital-in Rs 4,25,150 ba in Rs 2,60,700 an rul tawh a, Rs 1,64,450 an la ba a. Bethesda Hospital chuan Rs 1,27,200 bain an la rul lo bawk. H&ME department chuan blood processing man ba te chu an ba hrilhhriat tharna (reminder) an pe thin tih sawiin an remchan dan ang zelin an rawn rul mai niin an sawi a. May thla atang khan Aizawl Civil Hospital Blood bank chuan kalphung thar neiin blood bank atanga thisen lachhuak turte chuan an lakchhuah hmain a man an pek phawt a ngai tawh a. Hemi pekna tur hi cash spot payment (a sum faia pekna hmun) system siam a ni a, hemi hnu hian ba an awm ngai tawh lo niin department chuan an sawi.