Aizawl; Aizawl Civil Hospital ram thenkhat, Dawrpui Multipurpose Center Committee hnena lo sahthlak tawh chu a then azar Civil Hospital hnenah hlan let a, mipui tana hman tangkai dan tur tunhnai khan CYMA, MJA, MHIP, MZP,MSU, PUC, MZU te leh michal langte’n an sawi ho a. Multi Purpose Committee hnena pek tawh chu an mahni vek chuan Trauma Centre sak nana sahthlak an inhuam thu sawi lan a ni a. Kalkhawm tam zawk chuan hei hi tha tihpuiin PIL thehluh tawh chu a thehluttute’n mipui interest a ngaia an hnuhkir theih chuan tha an tihpui bawk. Hei hi a hlawhtling a nih chuan Dawrpui ram chinah Multipurpose Centre a awm anga, Civil Hosipital ram chinah Trauma Centre sak a ni thei dawn a ni. Thudawn danin Civil Hospital tih changtlun nan hian sawrkar laipui atangin vaibelchhe 45 hmuh a ni a, mahse a hmunhma a chep avangin Trauma Centre dinna tur hmun a awm tawh lova. Sawrkarin Dawrpui tana ram a lo sahthlak tawh zinga mi, Casualty hnaih lam ram zawl tha lai chu Dawrpui Multipurpose Center Committee ten an hlan let phal chuan a hnuaia garage a siamin Trauma Centre leh Civil Hospital a duty te riahna atan sak a remchang dawn hle tih sawilan a ni. Dawrpui Multipurpose Center Committee chuan an hlan let theih mai beisei a ni a, mahse mi thenkhat High Court a PIL thehlut ten an PIL an hnuhkir loh chuan hna tan a ni thei dawn lo a, PIL thehluttu pawh hian a hnuhkir beiseina sang tak a awm a ni. He sawihona, Health & Family Welfare Minister Lal Thanzara’n a kaihruai a, Finance Minister Lalsawta leh UD&PA Minister Zodintluanga te pawh an tel a ni.