Tunge a nih chiah?

Khawvel mipa tennis khel zinga ropui ber Rafael Nadal hian Grand slam title 22 teh meuh a la ta a, a hnuaiah hian Roger Federer leh Novak Djokovic te pahnih awmin 20 ve ve an la tawh bawk. Amah hi clay court (hard court leh grass court a awm bawk) thiam chungchuang bik clay lalpa tih ngam khawpa ropui bik a ni a, French Open (clay)ah phei hi chuan kum 17 chhungin vawi 14 zet a champion thei!

Vei Khawr...Naupang mittui tla fo chu:

Nadal-a inkhel hi chik taka in en a nih chuan, a chet felzia leh a nun mawizia in hmu ngei ang. Towel a thlep thlap thlap te, a tui ûm a rem thlap te, etc. Tin, vawi khatmah a racquet a la vawm lo bawk. Heti ang mihring a nih theihna chhan hi sawi ka chak.

Nadal-a hi a tet te atangin a patea, Toni Nadal chuan a coach (enkawl) thin a. Kum 10 mi vel a nih atangin ni tin darkar tam tak a khelhpui thin. 

Tawrhchhel zirtirna atan ruah sur hnuai, thli thawt lai, racquet hrui chhia, ni sat vanglaiten a inkhelhpui thin. "I chak lo a nih pawhin khaw awm dan, i racquet hrui, thli thawt dante chu chhuanlamah i hmang tur a ni lo. Champion dik tak chuan chhuanlam a nei ngai lo," tiin naupang te a nih lai atangin a fuih thin. 

Nadal-a hian ding leh veiin a vaw thei ve ve a, mahse chaw ei nan leh thil ziah na'n erawh a kut dinglam a hmang thung. A patea chuan a kut veilam chu a chak zawk tih hriain a veilam chiah chu hman a zirtir ta a. A hautak a niang, a hmuna awm ve thin an driver chuan,"A mittui tlaa a inhrut faih faih lai hi ka hmu fo thin," tiin a sawi hial. Mahse, a bei tang tang a, a tlawm ngai lo. 

Nadal-a pa hi sumdawng khawsa thei pangai tak a ni a, chuti chungin a patea thurawn lain, Nadal-a chu khawpui liana tennis zir tura chhuah tir lovin mahni inah a zir ta zawk a. A chhan chu a nungchang a hloh an hlauh vang a ni. 

Tlawm tak zelin:

"Pawimawh ber chu Nungchang hi a ni. A bak chu, a hnua rawn thleng tur chauh an ni," tiin Toni chuan ngaihdan nghet tak a nei. Heti a nih avang hian Nadal-a chu mihring tha ni turin a train nasa hle a, midang zahna te, hawihhawmna te, zaidamna te, inngaihtlawmna te a zirtir nasa thin hle. 

Dawhtheihna leh zaidamna a neih theih na'n tiin tennis ball pakhat chauhvin (a chang chuan) a training tir thin... Zing dar 9-ah sikul a kaltir a, chhun chawlhah darkar 2 vel tennis a train pui leh a. Chawhnuah sikul a kaltir leh a, sikul banah training-na hmun a panpui leh thin.

Tlaia an training-na hmun hi thliarkar pakhat, darkar rei tak tlan ngai a ni a. An driver chuan, motor chhung an luh atangin a patea chuan training a neih tanpui thin niin a sawi.

Tun khat chu Nadal-a chuan a champion avangin Mercedes Car a dawng hlauh mai a. A hlim haw hle. Mahse, a pate Toni-a chuan, "I motor dawn kha garage-ah dah tha la, i motor hluite kha khalh rawh. Mi naran nun i zir a la tha rih a ni," tiin a lo hrilh a, Nadal-a chuan eng dang sawi lovin a zawm ve mai bawk a.

"Tunlaia nu leh pa tam zawkte hi - French Open champion nih nge in duha, tennis player naran nungchang tha tak? Tiin zawt i la, a tam zawk chuan a hmasa khi an thlang ang. Hei hi kan khawvel buaina bul chu a ni," tiin Toni chuan Nadal-a chu mihring tha tak ni hmasa zawk tura a train nasat thu a sawi chhuak.

Amah Nadal-a pawhin heti hian a sawi a,"Ka patea khan min hrilh fo thin chu - 'i racquet i paih a nih chuan ka coach tawh lo vang che. I racquet hi i zah tur a ni, i ta ang hi awt em em, leina tur pawisa nei si lo Africa ramah naupang tam tak an awm tih hi hre reng rawh,' tiin. Chuvang chuan ka thin a rim pawhin ka racquet ka mawhpuh ngai lo, keimah zawk tisualtu chu ka ni," tiin a sawi.

Tlipna:

Hei hian nu leh pa leh naupangte min hneh se ka ti hle mai. Pass that kan duh lutuk avang te, hlawhtlin kan duh lutukna kawngah hian kan nungchang hi kan hloh palh ang tih a hlauhawm. 

Nadal-a pawh kha Tennis a khelh tirh khan a coach chuan,"Grand slam champion a nih chu a rinawm chiah lo. Mahse, a ni ve thei tho bawk," a ti lek chauh a ni. Mahse, a disciple leh a nungchang tha tak avangin a coach pawhin a beiseipui phak loh hmun sangah a awm ta dawrh mai a nih hi. 

A coach Toni-a'n Under 14 a champion tuma a tihdan chungchang amah Nadal-a ngeiin a sawi hi ka hre reng thin:
"Ka patea chuan ka champion chu min lawmpui thu a sawi hmasa ber a. Chumi zawhah, chu Tournament-a champion tawh mi 25 hming list min hmuh leh a, 'tute nge i hriat zui?' tiin min zawt a. 'Tunah hian hlim viau suh. ABC i thiam tan chiah a nih hi,' tiin min hrilh,"

- Dustin Lalkulhpuia