ZALEN June 15, 2026: Clean & Green Revolution Mizoram chuan vawiin khan Sairang Rel Station ah thing phunin, pangpar huan leh a chhehvel tihfai hnatlang an huaihawt.

Clean & Green Revolution hian Sairang Rel Station hi India rama rel station fai leh hring mawi bera chhuah an tum a, chumi hmalakna atan chuan Railways hotute remtihnain Sairang Rel Station kiang hi an cheibawl ta niin Pi Lalmalsawmi, Chairman, Clean & Green Revolution Mizoram chuan a sawi.

Hnatlang atan hian April par kung 50 leh Chawnpui kung 50 chu Forest Department in an pe a. Self Help Group, Sihhmui leh Commercial Vehicle Union, Sairang te nena ṭanghovin hnatlang hi an huaihawt ta a ni.

Clean & Green Revolution Mizoram hi kum 2018 June ni6-a din niin kumtin hmun hrang hrangah thingphun hnatlang an huaihawt thin a ni.

Vawiin rel station kianga thingphun leh tihfai hnatlang ah hian Agni Mitra, Conservator (Planning), Environment Forest & Climate Change leh JK Dawngzuala, Chairman, ZOHANDCO te pawh an tel a ni.