Aizawl; Vaihlo do kawngah Mizoram chuan hmasawn tanin meizial sim tum zingah 10% in an sim thei a, hetih lai hian sikul leh a chhehvel ah meizial a la zalen hle nia ngaih a ni bawk. He thu hi 1st State Level Coordination Committee (Tobacco Control) in 2009-2014 thlenga hmalakna a enletnaah sawi lan a ni. Tunkara neih tak meeting hi L Tochhawng Chief Secretary chuan kaihruaiin sawrkar anga vaihlo do tul a tih thu a sawi a. Lal Riliani, President ISTM chuan zirna in feet 300 biala vaihlo zawrh khap dan chuan zawm a hlawh loh thu a sawilang a, “He dan hi kenkawh theih ni tawh se,”a ti bawk. Dr Jane Ralte, Nodal Officer, MSTCS chuan Aizawl district Cessation Clinic a inziak lut zingah 212 in meizial an sim tawh a, 10.64% niin Lunglei district ah chuan 162 inziak lutin 10.3% in an sim thu sawiin, “Meizial thlah rate hi thla khat anga ziah luh chu a rei lova hriatna a awm vangin kum khat ang zela lak a ni,” a ti.