Closed Season / Hunting season

Admin - Oct 24, 2021

Ramsa kah pawh hi phal a ni lo chungin kan kap reng a, an inthlahpun hun te hi chiang taka inhrilh hriat ni se, Closed season te hi siam se mipui lam hi chuan kan zawm mai a rinawm

Ram changkang zawk ten an neih, keini lamah pawh kan sawi rik ve tak fo Hunting season hi hi a nihna ang hian kan hman theih kan la ring lo chu a nih hmel a, chutihrual chuan Nghafuan kan ven dan erawh a dang ta thung. Fisheries department chuan tunah pawh hian Closed season hmang mekin December 18 thleng Mizoram chhungah hman tur a ni a, Sangha inthlahpun hun lai a nih avangin sangha fuanna te chu YMA ten an veng hlawm a, thil zawng chhang tlak tak a nih ngei pawh a rinawm.

Kan hriat fo tawh angin khaw tam tak chuan an bul hnai lui te an humhalh tha hle a, khualzin tana hmuhnawm tling khawp hial te a ni. Chutihrualin heng sangha humhalh te avang hian humhalh loh chinah pawh sangha an tam phah em avangin mipui te pawhin an chhawr tangkai hle a ni.

Tunhma lam kha chuan ‘nghafuan ven’ an tih kha chuan sangha inthlah tura rawn kalkhawm te kha kan lo man ta thin kha a ni a, tunah erawh chuan man tum an awm ang tih hlauvin nghafuan chu an veng ta zawk a, hmasawnna nasa tak a tih theih ang. Kan lui dungah sangha pawh a tam phah ngei a rinawm.

Chutihrualin lui dunga nungcha te kan man danah hian hmasawnna ntur tam tak kan la nei a, bomb chu sawi loh, nungchate huat em em hmanga lui a cheng te kan hrai duh tlat te hi kan sim a hun ta khawp mai.

Kan ramsa te kumtluan maia kan veh te pawh hi kan sim a tha ta khawp mai. Ramsa leh savate  inthlahpun hun pawh ngaihtuah duh miah lova kum tluana kah tuma kan veh reng avang hian an tlem chak zul hle a, Hunting season neih kan la duh lo anih pawhin mithiam zawk te hian sava no neih hun te, ramsa no neih hun te hi inhrilh hriatna tam zawk nei ta se, heng hunlai hi chuan heng sa te leh savate hi khawih lo turin inzirtirna lam hi uar  ila, an rem chak lutuk tur hi a ven ngei a rinawm.

Ramsa kah hi phal loh a ni chungin kumtluanin kan kap chu a ni ber a, chuvangin tuna Fisheries department lamin Closed season an siam ang hian ramsa kah phal loh hun te hi mumal takin siam ni se, mipui lam pawh hian kan zawm mai a rinawm .

Share now