ZALEN November 4, 2023 : Thorang bial INC official candidate CLP Leader Zodintluanga chuan vawiin khan campaign kharna hun New Bazar, Marpara South-ah neiin MNF chuan an intiamna Cheng Nuai 3 aia tlemlo an sem theih tak loh avangin Mizoram mipuite Cheng 250000 leiba neiin an tla dawn ta a ni, a ti.

"An hotupa berin Cheng Nuai 3 aia tlem lo, NLUP dawng tawhte pawhin an dawng vek ang tia a sawi chu MNF chuan an tihlawhtling thei ta lova, Mizoram mipuite Rs. 250000 leiba nei chungin an tla dawn ta a ni. Mizoramah Congress in sorkarna an siam dawn avangin mipuite pawhin an tiam anga ti mai thin Congress sorkar tur an hmuhin an thla a muang hle tawh a ni," Zodintluanga chuan a ti.

Mama chuan hun a tlem em avangin duh anga a bial chhung pawh an fan chipchiar hman loh avangin party mite ngaihdam a dil a, chuti chunga mithar 2000 chuang zetin Congress party an zawm avangin a lawm hle tih a sawi.

"Thorang bial chhunga Congress mi leh sa, engemaw avanga min lo chhuahsan tawhte pawhin Congress rawn bel lehin an lo let leh deuh vek a, Congress chuan bung thar kan kaiah ka ngai a, lawm takin kan unaute ka lo lawm che u a ni," Zodintluanga chuan a ti.

Mama chuan Congress mipuiin in vote chuan mirethei tam tak leh mi harsa zawkte chhanchhuahna hna in thawk a ni tiin campaign kharna inkhawma kalte chuan a hrilh.

"Thorang bial tan hian theihtawp ka chhuah a, mihring famkimlo kan ni a, tih that ka neih rualin tihsualte pawh ka nei ang tih ka ring, tihsual aiin kan tih that ve te bial mipuite'n min chhinchhiah sak turin ka ngen che u a, kum nga dang lo awm turah a hma aia fimhur zawka ka kal theihnan min finchhuah zel ala ngai dawn a ni," Mama chuan a ti.

Mama chuan camapign-a an fehchhuahnaah MNF chuan SEDP sem chhunzawm tur angin mipui an bum a, inthlan zawh hnua sem leh tur angte pawhin an insawi a ni tiin, "Inthlan result a chhuah hunah MNF hi a tla dawn a, SEDP sem chhunzawm ngaihna a awm tawh lo. Congress party chuan Tang puihna hmangin mipui rethei, kuthnathawtute chhanchhuh hna, kan sorkar apianga kan tih thin chu kan chhunzawm leh dawn zawk a ni," a ti.

CLP Leader Zodintluanga chuan beisei aia inthlan hun a chawpchilh tak avangin hnawhsarum takin kan campaign a, hun tlemte ah theihtawp chhuahin kan khingpuite nen kan campaign tlang a, ka candidate puite duhsakna sang ber ka hlan a ni, a ti a. "Inthlanna ralmuang tak kan neih ngei ka beisei a ni," Zodintluanga chuan a ti.

November 7, 2023 Mizoram inthlanpui lo awm tura Thorang bialah hian polling station 37 a awm ang a. Party pali INC, MNF, ZPM leh BJP te'n candidate an nei.