Footballer te hi suma lei theih an nih avangin an khelhna club hi an sawn kual ve fova. Then khat chu an club thar tan ropui taka an chet nghal theih laiin thenkhat erawh an che fuh nghal mai bik lo. Tun tumah hian, club thar tana che fuh mai thei lo star 5 te kan han thai lang dawn a ni.  

#1 Lionel Messi (Paris Saint-Germain)
    Paris Saint Germain lamah Messi a lut a, team tha sa belh chhah nan a duhawm ber pawl chu a ni ngei ang. Khawvel tlar hma tha leh tawrh hlelhawm ber tia an sawi pawh hi a mawh lo. Mahse, Mbappe leh Neymar te nen an khel ho a, beisei angin an che thei tlat rih lo. Paris Saint-Germain coach Mauricio Pochettino pawhin a man thiam thuai a, Messi-a a nih vangin khelh tir reng a tum bik lo. 

Messi hian PSG tan game thum khel tawhin goal thun chu sawi loh, assiat takngial pawh ala nei lo. Game thum te chu a tlem em mai kan ti a ni maithei, mahse Lionel Messi te ang mi chungchuang bikin goal an thun lo a nih chuan khel chhia an ni mai. PSG game hnuhnung ber, Lyon nen an inkhelh tum pawh khan a khel chhe hran lo.

Champions League-ah Club Brugge nen an intum tumin a khel phelh angreng hle a, PSG tana a inlanna hmasa ber match Reims nena an khelh tum chuan a khel tha ve pangai. Lyon nen an inkhelh tum hian 1-1-a an inhneh tawk laiin manager Pochettino chuan minute 76 naah a la chhuak a, mual pawn lamah coach hian chibai tumin kut alo phar chhuak a, Messi hian chibai duh lovin a kal pel nghe nghe. Hetih lai hian a elpui ber Cristiano Ronaldo lahin a khel tha thei hle a, game thum khelhah goal li a thun der tawh. 

#2 Jadon Sancho (Manchester United)
    Jadon Sancho hi kum 21 mi chauha upa a la ni. Mahse, Borussia Dorund lama a ropui ang che turin, English tlangval hi Manchester United fans te chuan an beisei nghal. Mahse, chung beiseina te chu beisei bo a chang rih si.

Red Devils tan tum ruk a inlan tawhah Sancho hian tantu mipui beisei a la phak lova, Newcastle United nen an inhmachhawn tum khan, a khel tha ve hle nachungin goal luhna kawngah khan a inrawlh ve lo thung. An ram a top-flight khel tur hian a rilru lam inpeih turin hun tam zawk ala mamawh niin a lang.

Mual chhunga left-winger anga inlan thin Sancho hian mual chhungah harsatna a tawk mek a, a hma hun turah hian United boss Solskjaer hi a pawimawh hle. Rinna nghat a,  a hmang chhunzawm chho zel a nih chuan engtik ni-ah emaw chuan ropui takin a la inlan thei ngei ang. 

#3 Antoine Griezmann (Atletico Madrid)
    Transfer tawp dawn tepah loan hmangin Atletico Madrid lamah Antoine Griezmann a kal thut kha mi mak tih a tling. Season liam ta khan Griezmann hi Catalan tan rinloh takin a chetha ang reng hle a, competition hrang hrangah game 51 khelin goal 20 leh assist 13 a nei phak ngat a ni. 2019 khan Barcelona-ah lutin match 74 khel hmanin goal 22 a chhuih lut hman a ni.  

Barcelona lama a luh tirh khan, a season hmasa ber kha chu a hmang duhawm lo ve hle a, French playmaker hian buaina a tawk a nih kha, chutiang chiah chuan Atletico lamah pawh hian a tawk zui a. Tunah hian a club thar tan game 3 khel tawhin goal a la thun rih lo. Griezmann hian Diego Simeone hnuaiah eng tak ang zui ang maw?

Griezmann hian Atletico tan game thum khel tawhin goal thun chu sawi loh target zawna pet takngial pawh a nei lo a ni. Champions League-a Porto nen goal awm lova an in hnehtawk tum phei chuan Atletico Madrid fans lamin an nuihin an deuh sawh hle nghe nghe. 

#4 Gini Wijnaldum (Paris Saint-Germain)
    Paris Saint-Germain chuan Barcelona lama kal tawh mai tur a ngaih, Georginio Wijnaldum chu hun tawp dawn tepah an hijack  a. Dutchman hi Liverpool tan kum 5 chhung Anfield-ah ropui taka khelin team tan a tangkai em em a ni. Euro 2020-ah an ram team tan tha takin a khel leh bawk. 

Kum 30 mi Gini Wijnaldum hi Paris Saint-Germain tan tum 6 inlan tawhin goal a lathun lo va, tin beisei angin a khel chhuak hleithei rih lo. 

#5 Ben White (Arsenal)
    Arsenal hi 2021-22 transfer chhunga Europe-a sum seng hnem ber an ni a, chutichung chuan tun Premier League season-ah bul an tan tha lo hle. An player lak te hi an chhiat lutuk hlawm loh vangin sum seng hnem mahse, sawisel an la hlawh lutuk rih lo. Mahse, Brighton defender hlui Ben White-a khel erawhin beisei a phak rih lo hle.

Arsenal hian €58.5 million sengin kum 23 mi hi an lalut a, mahse tuna a game khelh dan en chuan a man hi a la phu rih lo hle. Manchester City leh Chelsea laka an tlawm tum phei chuan chet ngaihna a hre lo a tih theih hial awm e. 

White hi Arsenal debut a khelh tumin kai thar Brentford lakah 2-0 in an tlawm a, hemi tum hian goalkeeper, Aaron Ramsdale-a hnena a back pass vangin goal an chhuah teuh hle. A ni ang defender tawn hriat ngah tawh tan chuan thil tih awm lo tak a ni.