Karim Benzema chu Fifa Club World Cup tum lia goal thun thei hmasa ber a ni ta a, Al-Ittahad-in Thawhlehni zana 3-0-a Auckland City an hnehnaah goal a thun leh.

Benzema hian Romarinho leh Chelsea midfielder hlui, N’Golo Kante te thun hnuah an goal hnuhnung ber a thun a ni.

Saudi Pro League champion Al-Ittahad hi intihsiakna thlengtu ram aiawha inlan an ni a, second round-ah Africa khawmualpui aiawhtu, Al Ahly an hmachhawn leh ang.

European champion Manchester City chu semifinal atangin an inlan ve chauh dawn a ni.

Oceania aiawha New Zealand atanga inlan, Auckland City lakah hian Al-Ittahad hian goal thum hi first half-a minute 11 chhunga an thun a ni.

Brazilian forward Romarinho hian minute 29-ah goal hmahruai thunin minute nga hnuah Kante hian box chhunga ball tla fal a hmuh remchan atangin tha zetin a pet lut zui.

Benzema hian minute 40-ah a goal thumna thunin second round-a Al Ahly hmachhawn turin an inchhawp chhuak a ni.

A chak zawkin semifinal-ah Copa Libertodores champion Fluminense an hmachhawn dawn a. Semifinal lehlamah Premier League champion City-in Concacaf aiawhtu, Mexican club Leon leh Asia khawmualpui aiawh, Japanese club Urawa Red Diamonds chak zawk zawk an hmachhawn ang.

Kum 35 mi, Benzema hi Club World Cup-ah hian Real Madrid aiawhin vawi nga inlan tawhin tun tumin hi a vawi ruk inlanna a ni.

Real Madrid kawr haa a inlan vawi nga - 2014, 2016, 2017, 2018 leh 2022-ah a champion vek a ni.