European champion Manchester City chuan Urawa Red Diamonds chu si thum faia hnehin Club World Cup final an lut ta a, South American champion Fluminense nen Zirtawpni zanah an intum ang.

Pep Guardiola kaihhruai team hian inkhel pum pui thununin chawlhlawk hma chiahin Urawa defender Marius Hoibraten-a’n Matheus Nunes-a bawrh luh chu an lamah tilut palhin hma hruai nan an hmang.

Hemi hma zawng hian Japanese club hi tang khawngin City-in inkhel thunun viau mah se hun remchang tha an insiam hlei thei bik lo.

Chawlhlawk hnuah erawh thawnthu a dang ta a, minute sarih chiah an khel leh hman tihah Mateo Kovacic chuan City goal hnihna a thun nghal a. Kyle Walker-a pek chu Urawa defender-te thawlna laiah tak um lutin goalkeeper Shusuka Nishikawa a pet khum nalh hle.

Minute sarih lek a kal leh tihin Portugal midfielder Bernardo Silva chuan lei hrul titihin ding lam kilah a thun belh leh bawk a. Hemi hma hian ram tana a khelhpui, Nunes chuan a thun belh teuh hle bawk a, keeper Nishikawa-a’n tha takin a dansak hlauh.

City-in final-a an hmachhawn tur, Fluminense hian Thawhtanni zan khan African champion Al Ahly chu Jhon Arias leh John Kennedy te goal khat ve ve hmanga si hnih faia chakin final an lo lut tawh a ni.