April 20, 2023; Tunhnai ah inthlan a awm chho zut a, Lunglei Municipal Council (LMC) ah hneh takin ZPM an chak a. MADC VC inthlanpui a BJP chu fal takin a sangber bawk. Aizawl khawpui chhung LC by-election neih a mipui mit fukna chief minister bial chhung Zemabawk LC ah pawh ZPM tho an chak. An solid hial a, congress erawh tun dinhmunah chuan an 'chuai' rih niin a lang.

Nimin khan Zemabawk, Durtlang Leitan leh ITI Vengah te local council by election neih a ni a, zing dar 7 atanga tlai dar 5 thleng vote thlak a ni.

Member pasarih awmna Zemabawk LC by-election ah member zawng zawng thlan a ni a, Durtlang Leitan leh ITI Vengah chuan LC member pakhat ve ve thlan a ni a, vote thlak zawhah vote chhiar nghal a ni.

Durtlang Leitan local council by-election member pakhat thlanna neihah ZPM candidate H. Lalbiakkima a tling tih official a puan a ni a. (Durtlang Leitan ah hian MNF LC a ding sa a, a danglam phah dawn lo nia thudawn a ni. ) Member pakhat tho thlanna ITI LC ah chuan MNF candidate Lalpianmawia a tling thung. Hetihlai hian member pasarih thlanna Zemabawk LC ah ZPM candidate te hneh takin an tling.

ZPM candidate 7 te vote hmuh zawng zawng belhkhawm chu 15,134 niin, MNF candidate te vote hmuh belhkhawm 10,493 a ni. Hetihlai hian congress candidate 7 te vote hmuh belhkhawm chu 4,671 chauh a tling pha a, ZPM candidate te vote hmuh zat an phak lohna 10,463 zet a tling.

THLAN TLIN TE :

DURTLANG LEITAN LC -
1 C. Lalrinmawia             INC         251 
2 Rinmuanpuia               MNF       392
3 H. Lalbiakkima             ZPM     1115

ITI LC - 
1 HC. Thangkima            INC        173 
2 Lalpianmawia              MNF     1294
3 Ricky Vanlalhruaia      ZPM     1176

ZEMABAWK LC - 
1 Lalhmunsiama             ZPM      2472
2 P.C. Lalnunkima           ZPM      2034
3 Lalramhluna                ZPM      1863
4 P.C. Vanlalngaia           ZPM    2734
5 Zosangliana                 ZPM    2165
6 Lalmuanpuii                 ZPM    2163
7 Tlangkungi Tochhawng  ZPM    1703