Aizawl March 4, 2023: ZPM Thalai Headquarters chuan Chief Minister bial chhunga mi Sihphir Venghlun huam chhûnga kawngpui siamte a hmunah an tlawh a, Nausel Road leh Vasih Road-a kawng siamte chuan belhchian a dawl lo, an ti a, kum tam pawh a vei hmain kawng siamte tam zawk chu a khawk leh vek tawh niin a sawi.

ZPm thuchhuak chuan, "Chief Minister bialah kawng siamna atâna sum tam tak a kal ral lai a, a takah erawh kawng siamte a  chhe em em mai hi pawi kan ti a, mipuite zah lohna lian takah kan ngai a ni. Hruaitute'n an endik kawng thenkhat hi hripui len lai, ei leh in tur nei lova mi nawlpui mangang taka an awm laia MNF sawrkarin induhsakna hmanga contract hmanga thawh kha a ni a, kum tam a vei hma leh an term pawh a tawp hmaa an kawngpui siamte a khawk leh vek hman leh an rod phûmte pawh a lang leh fur fur ta mai hian MNF sawrkâr nihna dik tak a pholang chiang hle," an ti.

ZPM Thalai chuan, "Sihphir Venghlun Vasih Road-ah hian,  kawng siamna tur cement chu cement chawhna khawl pawh hmang lovin JCB hmanga chawh a ni a, lei lai khuarin JCB-in cement an chawk a, lei laih khuar hi cement hmanga zut mam pawh a ni lova, an cement chawhah hian lei a kai tel teuh ang tih pawh rin thiam theih a ni. Hetianga JCB hmanga cement chawh hi thil nih dan tur ni pawhin a lang lova, hetiang hi MNF sawrkâr hnuaiah kawng hmanga sum siamna dik takah a ngai a ni," a ti.

MNF sawrkârna hnuaiah CM biala hetianga hna belhchian dawl lo hmuh tur a awm chu ZPM Thalai chuan pawi an tih thu an tarlang a, mipuite'n an chan tur dik tak an chan a, hmasawnna hna rotling thawhna kawngah dik taka hnathawh a nih a, sum leh paite mipuite hlawkna tura hman a nih theihna turin chak takin hma lak zel an tum tih  ZPM Thalai chuan an tarlang bawk.