Aizawl September 11, 2024 : MPYCC President Laltawnliana chuan December ni 8, 2023-a ZPM sawrkar lakluh ni khan Lalduhoma chuan ni 100 chhunga an tih tur a puang a, lirthei lei a nih loh tur thu te a sawi a, mahse, tunah pawh Chief Minister Escort Vehicles atan Mahindra Thar pathum lei a ni leh tawh a ti.

2024 hi sawrkarin sum inrenchem kum atan a puang a, Chief Minister, Minister leh MLA ten 4th grade an neih theih chin tih tlem a nih tur thu leh Chief Minister, Minister leh MLA te tan lirthei kawl theih chin pawh tih tlem a nih dawn bakah Chief Minister, Minister leh MLA te tan lirthei lei a nih loh tur thu a sawi. Hetiang a nih lai hian Chief Minister hian motor 5 a kawl bakah officer thenkhat CM Office-a hman turin an motor kawl lai a chhuhsak zawk an ti.

MPYCC President chuan, "Hetiang a nih chhoh hnuah tunah hian Chief Minister Escort Vehicle atan tih chhuanlamin Chief Minister hman tur Mahindra Thar pathum lei leh niin he motor hian August thla khan Mualpui, Aizawl a thleng tawh a. Police Headquarters, Aizawl-ah Document tih fel ngai a la awm avangin kawl mek a ni. Heng motor te hi MZ 01 AC 1900, MZ 01 AC 1901 leh MZ 01 AC 1902 te niin Director General Of Police, Mizoram hminga Register a ni," a ti.

"Chief Minister Escort Vehicle atana lei Mahindra Thar Model pakhat pawh hi nuai 17 man niin pathum leina atan hian mipui sum cheng nuai 51 sen ral a ni leh ta. Hemi hma hian Mizoram Assembly Speaker Motor Mahindra XUV lei nan Nuai 28 leh Quarter chei nan cheng nuai 23 hman niin; Speaker Motor leina leh Quarter chei nan mipui sum cheng nuai 51 sen ral a ni tih RTI chhanna leh Speaker Press Conference ah a chiang," an ti bawk.