Aizawl: New Economic Development Policy (NEDP) hnuaia khua leh tui harsa zawk ten chenna in tha zawk an lo neih theih nana hmalakna, Chief Minister's Rural Housing Scheme chu nimin khan I&PR Auditorium, CHANEM Building-ah Tuichang bialtu MLA Lalrinliana Sailo-in a hawng. Champhai DC Vanlalngaihsaka kaihhruai programme-ah hian khuallian Lalrinliana Sailo chuan Chief Minister Housing Scheme chu sawrkar flagship programme NEDP hnuaia scheme pawimawh tak a nih thu sawiin, in sakna tur pawisa  chuan in thar hlawk sakna daih lo mah se, furpui thlen huna thli leh ruah laka him lo tur inte thawmthatna  anih dawn avangin a chhenfakawm a ni, a ti a. A mamawh leh dawng tlakte chauhin an dawn theihna turin nodal department leh khawtlang hruaitute  tanho a pawimawh dawn thu a sawi bawk. He scheme-ah hian Champhai, Kolasib, Mamit leh Aizawl District beneficiary 2000 vel awm tura tih niin, in pakhat sak nan Rs. 50,000 zel installment-a pek a ni.