ZALEN August 24, 2026: India entrepreneur te leh BRICS ram te an thawhho theihna atana hmalatu BRICS Entrepreneur Alliance (BEA) Global President & CEO Dr. Bhaskar Jyoti Sonowal leh Chief Minister Lalduhoma te August 7-a New Delhi-a an inkawmna kal zelah vawiin khan BEA team te chuan Mizoram an rawn tlawh.

Chief Minister Lalduhoma hovin CM Conference Hall-ah meeting an nei a, Chief Minister chuan Carbon trading, Sawhthing sawngbawlna (ginger) leh Tourism-te chu Mizoram sawrkarin BEA nena thawhdunna kalpui hmasak a duhnate an nih thu a sawi a, BEA lamin chak taka an rawn umzui avangin lawmthu a sawi a. An ruahmanna rawn siamte chu a tul ang zela bawhzui tur a nih thu a tarlang.

Meeting-ah hian BEA thawhpui Firm leh Company hrang hrangten Mizorama hma an lak theihna laite sawifiahna an nei a. Florata Bio Complex, Russia chuan Mizorama thlai tana an Bio Stimulant siam hman tangkai kawnga hma an lak theihna sawifiahna an nei a. Maximeyz-ten Tourism lama Mizoram phochhuah leh hmalak theihna an neih te sawifiahna an nei a, Carbon Project Developer Jatin Kapur chuan Carbon Credit lama hmalak theihnate sawifiahna a nei bawk.

Carbon Credit chungchangah hian Carbon tihtlemna (carbon-removal projects) te, Afforestation & Reforestation (ARR) te, Blue Carbon, BECCS leh Biochar-te sawifiah a ni a. Thingtlang mite tana eizawnna siamsak te, carbon leh private investment hmanga sum leh pai tam tham tak Mizorama lakluh a nih theih dante pawh sawi lan a ni.

Khualzin hip kawngah Mizoram chu Goa, Kerala leh Kashmir ang state hmingthang sate nena inel lovin, thil thar hmuhchhuah leh tawn thar (experience-led destination) lamah nasa zawka hmalak a that an ring a. Sum ngah zual (High-Net-Worth Urbanites), Corporate & Tech lama thawk te leh Gen Z khualzinte a tam thei ang ber hip luh (target segments) tum zawnga hmalak theih niin an ngai a ni. 

Isreal Company atangin Micro Drip Irrigation leh Climate Control Green House te, Drone Enable Logistics bakah Security lama hma an lak theihnate ngaithla a ni a.

Sawhthing sawngbawl leh a hralhna tur market chungchang pawh sawi ho niin, International Market-a hralh theih dan tur te an sawi bawk a ni.