ZALEN June 23, 2026: Mizoram Resource Mobilization Committee (MRMC) chu an Chairman, Chief Minister Lalduhoma hovin CM Conference Hall-ah vawiin khan an thukhawm a, sawrkar sum remchem tura hmalak dan tur pawisa thawh chhuah dan tur te sawiho a ni. 

MRMC hian Chief Secretary leh Secretariat-a officer ten household MR an kawl zat a lo tihtlem sak tawh thu sawi a ni a, kum tin vaibelchhe engemaw zat a hum theih phah tih a ni. Mizoram Police officer te’n orderly (Ar-da-li) an kawl mi 118 vel pawh tihthlem leh tha an ti a. Sum leh pai senso a tlem phah dawn bakah Police department-a thawktute daihzai zawka semdarhna a nih nghal tur thu sawi a ni.

District tina Deputy Commissioner Office te manpower tihchak an ngai avangin sawrkar inrenchemna hre reng chungin thuam chak dan tur MRMC, Administrative Reforms Sub-Committee-in lo ngaihtuah se, an ti bawk.

Mizoram sawrkar hnuaia thawk doctor ten an lak mek Non-Practicing Allowance (NPA) pawh ngaihtuah leh a ni a. Doctor ten NPA hi dik taka an lak theih nan ‘Monitoring System’ changtlung tak siam an rawt.

Mipuiten sawrkar atanga service an dawn “Right to Public Services Act, 2015” hnuaia Service 197 tarlante chu a hun taka a hmangtu mipuiten an hman theih nan tun aia tha zawka vil ni se, an ti.

Zuangtui Industrial Estate chhunga Industrial plot dawngtuten a nihna ang taka an hman theih dan tur te, Balu leh Lung atanga chhiah lak belh theihna te, sawrkar inrelbawl dan tha zawk neih dan tur leh sum inrenchemna lam thil eng emaw zat an sawi bawk.

He hunah hian Mizoram Resource Mobilization Committee Vice Chairman Haukhuma Hauzel, IAS (Rtd), Ministers – Lalrinpuii, F. Rodingliana leh MRMC member te an tel.