October 5, 2023; Nizan hmasa khan Aizawl East-I ah MNF zawmtu mi 130 hnen atangin membership fee an dawng tih CM in a tarlang a, membership fee petute chu Thuampui veng leh Zemabawk atangin Neutral - 94, ZPM - 32, INC - 4, an vaiin voters 130 an ni.

CM in a official IG page a a tarlan danin, membership fee pe thar zingah hian PC Vanlalngaia, ZPM Local Council Treasurer ni lai mek a tel a. Vanlalngaia hi Zemabawk Local Council Bye-Election neih zawh taka ZPM Candidate zinga vote hmu sang ber kha a ni.

MNF zawm tharte kan lawm em em che u a, MNF ah hnam rilru pu kan kalkhawm a ni, CM chuan tiin, "Piantirh atangin hnam rilru pu vek kan ni a, MNF ah hian hming ziak hmasa leh ziak hnuhnung kan awm mai a ni," a ti bawk.

"Vawiin chu chanchin lawmawm thlen ni a ni a, eng vanga East-I Bialah hian ding mai nge ka nih chu ka hre bik hauh lo, khawilam thli ṭhain nge min chhem lut(?); a mak hle a ni! East-I chu ka bial rei tawlh tawlh a, tifuh pawh ka inti telh telh a ni," ti bawkin, "Tunlai Zoram politics boruak thlirin MNF thli chu rampumah a tleh mek zel a. Pathian-in a hmachhawp tihlawhtling tura MNF min hualhimna leh min venna hi a ropuiin a mak em em a ni, a ti.