October 19, 2023; MNF president chief minister ni bawk Zoramthanga'n luhlul a ṭul huna luhlul ngam MNF hian sawrkarna chang lo ta ila, kan unau Myanmar leh Bangladesh aṭanga himna zawnga an Inpui rawn bêl tute hi umlet vek an ni ang, tih a tarlang.

A official Instagram page a a tarlan danin, nizan khan Ṭhuampui Vengah Mithar Lawmluh & MNF Election Campaign Office Hawn Inkhawmah mi thar Voters 233 MNF Party-ah a lawmlut a. Kum 2018 inthlan zawh aṭanga Ni 18.10.2023 thlenga Aizawl East-I biala MNF pun belhna chu: ZPM - 728, INC - 720, BJP - 51, Neutral - 519; Total - 2018 a ni.

'Ram hmasawnna tura hmathlir thui tak kan neih hi hrethiam loten ṭawng umpha lo ang lek lekin an sawi ṭhin. Thawh hlima tih tur ngaihtuah chawptu ai chuan a tuka thawh tur ngaihtuah lawktu chuan hlawhtlinna a chang zawk ngei ang,' tiin a tarlang bawk.

Kan Unau Myanmar, Bangladesh leh Manipur-a mite chuan '2023 Inthlanah MNF hnam thinlung pu hi in sawrkar lo palh ang tih hi nangni aiin kan hlau zawk' tih an sawi ṭhin tih tarlang bawkin, "Pathian leh mipuite zarah kan sawrkar leh ngei ang tih kan ring a; ram pumah MNF hi Pathianin mal min sawm mek a ni," a ti bawk.