Aizawl: Chief Minister Lal Thanhawla chuan Zirtawpni khan Lunglei High Powered Committee sum senga sawrkar building sak zawh thar pathum chu Lunglei ah a hawng. HPC sum senga sawrkar in sak te chu Rs. nuai 65.80 senga sak, Lunglei Power Circle, P&E SE Quarter, Rs. Nuai 48 senga sak, Lunglei Civil Hospital Medical Superintendent Office leh Rs. Nuai 45 senga sak, District AH & Vety Office te an ni. Chief Minister Lal Thanhawla chuan Mizoram in kawng tam takah hma a sawn mek tih a sawi a. NITI Aayog chhuichianna sawi chhawngin, “Ei leh in tha khamkhawp hmuh loh avanga hrisel lo sawina, Malnourishment-ah Mizoram chu state dang zawng zawng aiin a ziaawm ber a, kum 2013 atanga 2016 chhunga state 4, an State Gross Domestic Product (SGDP) pungchho zel chu Mizoram, Jharkhand, Tripura leh Gujarat chiah an ni a. State Per Capita Income-ah India ram pum aiin kan sang a, Ministry of Finance chhutdan chuan kan state SGDP punna chu 10%-in nakum lamah a chho turah a chhut a, tunah hian kan state SGDP punna hi 9% chuang a nih lain National GDP chu kum 2016-17 chhungin 7.6 chiah a ni a, central sawrkarin kan chungah hmasawn turin beiseina a nei a ni,” a ti. Chief Minister chuan Power-ah Mizoram chu nasa takin a inpuahchah lawk tih sawiin Tuirial Hydel Project chu nakum kumtirah hawn tum a ni a. Vankal rama nizung chakna hmanga electric current siam hna chak taka thawh mek a nih bakah Tuirini Hydel Project megawatt 25 pechhuak thei siamna tur chak taka nawr mek a nih thu a sawi bawk.