Aizawl: Ei leh bara Mizoramin hma a sawn theih nana kawng hrang hranga sawrkar leh mi mal leh pawl anga mawhphurhna fawng vuantute intawhkhawmna runpui, Mizoram Economic Conclave chu Zirtawpni khan Chief Minister Lal Thanhawla chuan Assembly House Annexe Conference Hall-ah a hawng. Ram ei leh bar, economy hmasawnna chu thui takin sawrkarna tha/ good governance-ah a innghah thu Chief Minister chuan sawiin, tun dinhmunah state dangte leh India ram pum huap pawhin Mizoram chu GSDP leh Per Capita Income-ah te a thang chak pawl leh a sang pawl a ni chho ta zel chuan sawrkarah thawktu tha leh thahnemngai tam tak an awmzia a tilang a ni, a ti. Finance Minister Lalsawta chuan NEDP hnuaia Entrepreneurship tihhmasawnna kalpui mekah mi tum ruh tlat, sawrkar tan thawhpui nuam tak an awm thu leh chu chuan Mizoram economy-ah pawh zawi zawiin nghawng tha a nei chhoh zel tur thu a sawi bawk.