Aizawl; Chief Minister Lal Thanhawla chuan Doctor te chu Aizawl khawpui ringawta awm tum lova thingtlang lamah thahnem ngaia taka awm turin a ngen. Zirtawpni tlaia Indian Medical Association (IMA), Mizoram State Branch ten Aijal Club a khawmpui an neihna ah he thu hi sawiin Chief Minister chuan thingtlang lama Doctor an awm that chuan nausen thihna infant mortality rate pawh a hniam theih a beisei tih a sawi a. Chief Minister chuan, "12th Five Year Plan kan hman mekah hian thawhchhuah awm tur zawnga hmala a, project pawimawh bikte uluk taka kalpui a ni,” tiin CM-in a sawi. CM chuan “Ngaihpawimawh bik tura kan duhte zingah zirna, hriselna, ei tur tha leh tui thianghlim pek, retheihna tih ziaawm a Rural Development Program kaltlanga thingtlang mite tana eizawnna buatsaih sak te an ni", a ti bawk. IMA hian kum 2015-2016 chhung hruaitu atan heng mite hi an thlang. Vice President Dr. Vanlalruata, Honorary Secretary Dr. John Zohmingthanga, Assistant Secretary Dr. Chawnglungmuana, Treasurer Dr. Lalhuthangi Hmar, Finance Secretary Dr. R.Lalduhawmi.IMA, Mizoram Branch ah hian member (Doctor) 694 an awm mek a, heng zinga 42 hi life member an ni. Economic Survey 2013-14 a Health Sector bik tarlan danin Mizoram ah Health Sub Centres - 370, Primary Health Centre (PHC) - 57, Community Health Centre - 12 leh Hospital - 13 a awm a. Naupang kum 3 hnuailam zinga 25% te chu eitur tha hmu zo lo (malnourish) an ni a. Doctor 1 in damlo 2455 leh Nurse 1 in damlo 1477 enkawl anga chhut a ni.