ZALEN, June 14, 2026: Sawrkar thil pawimawh buaipuia New Delhi-a cham mek, Chief Minister Lalduhoma chuan Zirtawpni khan Union Home Minister Amit Shah chu a pisa, Kartavya Bhawan-ah a hmu a, Mizoram hmasawnna tur thil pawimawh tak tak a sawipui.

Chief minister hian Security Related Expenditure (SRE) Scheme hnuaia hmarchhak bialten tanpuina an dawn thinah Mizoram chu hel awm lohna, state ralmuang a nih avangin pek a ni ve lo a. Drugs tawlhrukna leh cyber crime dona kawnga sawrkar tha tih chak nan SRE hnuaiah hian sum (funding) pe ve turin a ngen a. Home Minister chuan hmarchhak bial hmasawnna tura ruahman bik, PM-DeVINE (Prime Minister’s Development Initiative for North Eastern Region) Scheme atanga project thehlut zawk turin a lo rawn a, a lo bawhzuisak tur thu pawh a hrilh a ni. 

Chief minister chuan Manipur, Bangladesh leh Myanmar atanga raltlan mi 40,000 dawn Mizoram an awm mek thu te, state sawrkarin heng mite chhawmdawlna tur hian theihtawp a chhuah zel thute sawiin, “Sawrkar laipui tanpuina kan mamawh hle a ni,” a ti a. Home minister chuan raltlante chhawmdawlna atan hian Mizoram sawrkar hnenah Rs. vaibelchhe 10 man hu buhfai pek a nih tur thu a lo hrilh a ni.