Aizawl: Chief Minister Lal Thanhawla chuan Police Officer te chu an hna leh mimal nunah invawng reng turin a chah. Mizoram Police Service Association (MPSA) ten Zirtawpni kaltaa General Conference vawi 10-na, Arya Mess, PHQ Khatla an neih a hmanpuina ah Chief Minister chuan police te chu Mizoramin remna leh muanna a neih kengkawhtu pawimawh ber an nih thu leh an laka mipui beisei pawh a san thu a sawi a. “Khawvel changkang zelah sualna pawh a changkan chhoh zel avangin hriatna leh thiamna tihmasawn a in-update ve zel a tul a ni,” a ti a. Chief Minister chuan, “Mizoram hi state ralmuang a nih avangin kan vannei hle a, mahse chu kan ralmuanna chu mi thenkhatin dan phal loh thil ruihhlo, ralthuam, thingzai leh a dangte tawlhrukna kawng remchangah an hman phah ta niin a lang a, chuvang chuan venhimna thawktu kan police-te hi an pawimawh hle, an hna tha zawka an thawh theih nan tha zawka kan thuam that pawh a tul a ni,” a ti bawk.