ZALEN January 19, 2026: Chief Minister Lalduhoma chuan vawiin khan kum 5 chhunga zawh hman tura ruahman 24 Megawatt Tuirini Small Hydro Electricity Power Plant dinna tur lungphum Tuirini kamah a phum.

Home Minister K. Sapdanga chu khualzahawm niin P&E Minister F. Rodingliana chuan lungphum inkhawm a kaihruai a, I&PR Minister B. Lalchhanzova leh Lt. Col. Clement Lalhmingthana, MLA te chuan Chief Minister hi an tawiawm a ni.

He power plant hi Externally Aided Project sum hmanga cheng 676.98 crore senga thawh tur niin New Development Bank, Sanghai atanga loan Rs. 676.98 Crore hmanga thawh tur a ni.

Thusawiin Chief Minister chuan, power siamchhuahna lama hma sawn theih nan Power Minister leh P&E Department-a thawktute inpekna a sang ea ti a. An chungah lawmthu a sawi a ni. "Thla hmasa khan Thenzawl Solar Power Plant, Megawatt 10 pe chhuak thei kan hawng a, Sumsuih-ah Megawatt 5 pe chhuak thei tur Solar Plant kan thawk mek bawk a, hna zaa 20 kan thawk tawh a. Thenzawl leh Sumsuih solar plant hi Mizoram ta liau liau a ni. Tunah 24 Mw Tuirini lungphum kan han phum leh a, 132 Mw Tuivai pawh chak taka bawhzui zel a ni," a ti.

CM chuan 24 Mw Tuirini hi chak taka thawh a, a hun taka zawh kan tum ang, a ti. Hna hi kum 5 chhunga zawh tura duan a ni a, power house-ah hian Megawatt 12 pe chhuak thei khawl pahnih, an pahnih belhkhawm 24 Mw tling tur bun a ni ang.

Tuirini Project hi February 5, 2024 khan P&E Department chuan Externally Aided Project (EAP) hnuaia thun turin proposal state sawrkarah a thehlut a, State Level Screening Committee chuan April 4, 2024 khan a ngaihtuah a, a approve a. Department of External Affairs (DEA) Screening Committee chuan February 28 2025 khan External Funding turin a rawn approve a ni.

New Development Bank-in a funding tura tih a ni a, project cost 80% hi loan angin NDB atangin lak a ni ang a, central sawrkarin a rul ang. Project Cost atanga 20% hi state sawrkar tum ve tur a ni. Total cost of Project hi Rs. 676.98 Crores a ni. Kum nga (5) chhunga thawh zawh tura ruahman a ni.