ZALEN October 11, 2023 : Congress Legislature Party Leader Zodintluanga chuan, "Kan Chief Minister-in kan leibat tam luat avanga tehna dik lo hmanga mipui min bum phet a tum hian Mizo mipuite min zah lovin, a rilru nat thlak takzet ka ti. Khawvel leh India ramin leiba tam zawng tehna a nei a, chu chu state-in kan thawhchhuah (GSDP) atanga chhuta kan leiba percentage a ni," a ti.

Vawiina chanchinthar lakhawmtute a kawm naah Zodintluanga chuan, Reserve Bank of India data-a a chiang tawh (actual) hnuhnung berah chuan Mizoram hian GSDP atanga chhutin leiba 56.7% a nei a, India rama leiba ngah ber a ni. Data hnunhnung ber mah se, la danglam thei 2023 (budget estimate) ah pawh GSDP atanga kan leiba tura chhut chu 53.1% niin, India rama leiba ngah ber a ni leh dawn tho. Leibat dan enin actual a chhuah hunah chuan 53.1% aiin a sang ngei dawn tih chiang sa a ni, a ti.

Thawh chhuah ngah tak leh thawhchhuah nei tlem tak bat zat hi an pawisa bat zat atanga chhut a fuh theih loh avangin, khawvel pawhin ram leh state-te leiba chhutna atan an thawhchhuah zat (GSDP) atanga an leiba neih zat percentage hi leiba neih tam zawng tehna a hmang reng a ni, tiin Zodintluanga chuan, "Kum 1 a cheng nuai 10 thawk chhuak thinin cheng sing khat leiba a neih nge, kum 1 a cheng sing 1 thawk chhuakin, cheng 10 ba se phurrit ni zawk ang. Heta tang ringawt pawh hian leibat zat tam zawng hi GSDP atanga a percentage zat chhut tur tih a lang chiang hlein a rinawm," a ti.

CAG report hnuhnung ber en chuan Mizoram sawrkar chuan a leibat cheng vbc. 3,797.95 (83.28%) chu a hma-a leiba a lo neih tawh rulhna atan a hmang a, a bak 762.33 (17.72%) chu thil dang atana hman a nih thu chiang taka tarlan a ni. Hei hian Finance enkawltu Chief Minister sum enkawl kawngah a hlawhchham tih chiang takin a tilang, a ti bawk.