Aizawl April 12, 2023 : Vawiin chawhma khan sawrkar laipuia Ministry of Development of North Eastern Region (DoNER) enkawltu Minister of State BL Verma hovin Mizoram chhunga DoNER ministry hnathawh te thlirho a ni a, he hunah hian Chief Minister Zoramthanga chuan NERSDS hnuaia Mizoramin project pali a neih zinga pakhat BRO ten hna an tan theih loh chu Mizoram PWD kuta hlan mai turin DoNER Minister hnenah hian a rawt.

He hunah hian Verma chuan India hmarchhak hmasawnna atan sawrkar laipuiin theihtawp a chhuah a, Prime Minister in a ngaih pawimawh avangin kumtin hmarchhak tihhmasawnna tur sum pawh tihpun zel a ni a ti a. Inkalpawhna kawng leh hmasawnna ruhrel lian tak tak siam zel a nih thu sawiin a tul angin hmalak belh zel a ni a ti bawk.

Chief Minister Zoramthanga pawhin Mizorama DoNER ministry hnuaia hmalakna te chu tha taka tihhlawhtlin vek a nih tur thu sawiin, North East Road sector Development Scheme (NERSDS) hnuaia Mizoramin project pali a neih zinga 3 chu Mizoram PWD in an thawk tih sawiin Border Road Organisation (BRO) in project pakhat an chan chu tun thlengin bul an la tan theih loh avangin hmasawnna a tikhawtlai thei dawn niin a sawi a, Mizoram PWD kuta hlanchhawng mai turin Minister hnenah hian rawtna a siam a ni.

Tun dinhmunah Mizoram chhungah DoNER ministry project hrang hrang 76 kalpui mek a awm a, Planning & Programme Implementation department official ten powerpoint presentation hmangin report an pe bawk a ni.

Chief Minister’s Conference Hall-a meeting hi Chief Minister Zoramthanga chuan telpuiin, Planning Vice-Chairman H. Rammawi, Finance Principal Secretary Vanlalchhuanga, Secretary to CM K. Lalthawmmawia bakah DoNER Ministry hnuaia project khawih department aiawhte an tel a ni.

Chief Minister Zoramthanga leh Minister of State for DoNER BL Verma te hi tukinah khan a hranpa a inkawmin tukthuan an kil dun a ni.