Aizawl June 26, 2024: International Day Against Drug Abuse & Illicit Trafficking, 2024 chu vawiin khan Vanapa Hall ah hman a ni a. Chief Minister Lalduhoma chuan he hun hi hmanpuiin; Mizoram mipuite chu ruihhlo leh dan lova ruihhlo phurh dona hna thawhpuiah a sawm a, nu leh pa te an fate thlithlai tam turin a ti a, khauh taka khuahkhirh turin a ti.

Lalduhoma chuan, "Kan fate drug laka an him theih nan hian chhungkua kan pawimawh hle a, nu leh paten kan fate thlithlai taima ila, nun kawng dik an zawhna tur a nih phawt chuan khauh taka khuahkhirh hi i hreh lovang u. Chu chu Pathian pawhin a phal a ni," a ti.

Chief Minister chuan, "Kan chhak lam ram thenkhatte khi khawvel hriata ruihhlo buaipui, Golden Triangle an tih thin an ni a, chuta tanga ruihhlo lo chhuk thlakna kawngpuiah chuan kan awm avangin hun rei tak ruihhlo hian min chim buai tawh. Keinin thapui thawhin lo do mah ila kan thenawm ramten an beih ve si loh avangin kan mal tan a, a sawt mawh hle. Supply a tam avangin a man a tlawm a, kan thalai tam takten a ngawl an lo vei phah a. Sawrkarna kan chan ve leh a theih ang angin beihpui kan thlak nghal a ni. Mitin huapa do ngai anih avangin kohhran hrang hrang leh tlawmngaipawlte, kan ram mipuite hi thawhpuiah kan sawm a ni," a ti.

"Hun rei tak reh tawh State Level Ruihhlo Do Core Committee kan tinung thar a. Supply Reduction mawhphurhna hi Excise & Narcotics kutah dahin Demand Reduction hi Social Welfare & Tribal Affairs kutah dah a ni. Kan tlawmngai pawl te inpekna pawh a ropui hle, an chungah lawmthu ka sawi a ni. Tin, central sawrkar hnuaia hmalakna peng hrang hrang Narco Co-ordination Center (NCORD) te, Anti-Narcotics Task Force (ANTF) te, Nasha Mukt Bharat Abiyaan (NMBA) te pawh tha takin kan kalpui reng," a ti bawk.