Aizawl; Chief Minister Lal Thanhawla chuan Mizoram sawrkar hnuaia Secretary hrang hrangte chu lehkha (DO Letter) thawnin an department hmalakna zel tura an ngaihdan te thawhkhawm turin a hriattir. Chief Minister in Secretary te hnena lehkha a thawn ah hian an department chan theuha hmasawn an ngaihna lai te, tangkai zawka pawisa hman dan tur te, inrenchem leh sum hmuhna ngaihtuah tur te, kalphung thalo tih danglam ngai leh thawhhona tha zawk a awm theihna tur ruahmanna siam tur te in a hriattir a. Department Secretary te chu a lo berah Department pakhat tan rawtna 7 aia tlemlo thehlut turin a ti bawk. He lehkha hi July ni 25, Zirtawpni khan tihchhuah a ni a, August ni 5,2014 hmaa chhanna thehlut vek tura hriattir a ni bawk. Zalen thudawn danin he rawtna hi tunhnaia Prime Minister Narendra Modi in Secretary rual a kohkhawm tuma rawtna an siam zulzuia tih a ni a, hei hian kalphung thalo lai siamthat leh thawhhona tha siam a tum ber a ni. Kalphung pangngai ah chuan rawtna te hi Minister kaltlangin Chief Minister-ah thehluh thin a ni a, mahse tun tumah hi chuan Secretary ten ‘direct’ in Chief Minister ah rawtna an neih te an thlen dawn a ni. Secretary te hi August ni 5 thleng hun pek ni mahse la thehlut lo engemaw zat an la awm a, heng rawtna te hi Chief Minister Delhi zin lo haw hunah la sawiho leh tura rua-hman a ni.