Aizawl: Chief Minister Lal Thanhawla chuan Zirtawpni khan Pachhunga University College Seminar Hall-a neih Mizoram a nungcha, thing leh mau thliar hran fel leh chhinchhiah chungchang ‘Seminar on Challenges in Bio-Systematics in Mizoram’ tih chu a hmanpui a. Life Science huangchhunga Mizo Scientist titha te hnenah chawimawina a sem nghal. Chief Minister chuan, “Kum 20 chuang ram a buai chhung khan rampawn lammite, biodiversity a kan state hauhsakna hrechiangtute khan kan ram chhunga thilhlu chitin reng nauban, thingrai leh ramhmul damdawi hrang hrang te dapin an ru chhuak nasa hle a. Thingtlang chu sawiloh khawpuiah pawh khang thil hlutna hria leh humhalhna chang hria kan awm manglo kha a pawi tak zet a ni,” a ti. Chief Minister chuan Mizoram awmna hmun chu thlai leh thei chitin reng thatna, ramngaw pawh chak taka insiam leh theihna nia sawiin humhalh tur leh a hauhsakna chhawr tangkaia hlawkpui nana hmang tur chuan thawhrimna a hmuhchhuah a ngai tih a sawi bawk. Seminar on Challenges in Bio - Systematics in Mizoram hi Directorate of Science & Technology, Mizo Academy Of Science leh Pachhunga University College tangkawpin an buatsaih a ni a. Seminar-ah hian Mizoram chhunga rannung, thlai leh hnim hnah chi 30 khawvelin a la hriatchian loh leh chhinchhiah loh hmuchhuak tute zinga Scientist 14 - H.Lalthanzara, Lalramliana, HT Lalremsanga, Saipari Sailo, VL Hrima, John Zothanzama, Samuel Lalronunga, Lalnuntluanga, Beihrosa Solo, Denis Val Lalhlimpuia, Vanramliana, Laltlanhlua Zathang, Lalrotluanga leh H.Lalramnghinglova te hnenah chawimawina thilpek Chief Minister hian a hlan a. Rannung chhinchhiah tharte hi sangha chi hrang hrang, rulhut, changpat, uchang chi hrang hrang, pa chi thar leh sawhthing te a ni.