Aizawl: Chief Minister Zoramthanga chuan nimin khan SASCI atang vbc. 6.5 vel estimate siam hmanga sak tur Govt. Serchhip College Administrative Building sakna tur lung a phum.

Lungphum phumna puala inkhawm, Govt. Serchhip College Academic Building tuala neihah chief minister chuan Govt. Serchhip College Administrative Building sa tur hian a tirah Rs. vbc. 10 vel estimate siamin hei hi a tam deuh avangin college a thawktute chuan engineer-te nen vbc. 6.5 vel estimate siam lehin SASCI atangin sum hi ruahman a nih thu a sawi a. Hemi atana hma latute thawhrah chu a intan dawn ta tih a sawi a. Chief minister chuan tun ministry an hman tan dawn khan Planning Commission-in kalphungte lo tidanglam tawhin nasa taka hmalak an tum thu leh an sawrkar kum khatna, kum 2019-ah pawh nasa taka hma an lak thu sawiin, kum 2020-ah Covid vangin harsatna an tawk tih a sawi a. Tunah chuan hriten ziaawm lam panin kum 2019-a hmalaknate pawh an chhunzawm leh mek thu a sawi bawk.

He huna khual zahawm Tuikum bialtu MLA leh Social Welfare and Tribal Affairs Minister Er. Lalrinawma pawhin Govt. Serchhip College in Administrative Block tha tak a nei tur chu a lawmpui thu a sawi a. Mizoram-a zirna siamthat a nih theih nan zirtirtu tam tak lak belh a nih bakah SEDP atang pawhin zirtirtu tam tam lak belh an nih tawh thu a sawi a. Tuikum bial-ah pawh sawrkar enkawl Primary School leh Middle School-ah pawh MR-a thawk tur Zirtirtu te lak belh an nih hnuah zirlai 273 laia an pun thu a sawi bawk

Govt. Serchhip College Administrative (Block) hi Special Assistance to States for Capital Investment (SASCI) atanga sum hmuh hmanga sak tur niin sanction amount chu cheng nuai 650 niin Agreement amount chu cheng nuai 568.36 a ni a. Feb. 27, 2023 atanga sak tan tur niin Feb. 27, 2025-a sak zawh tura ruahman a ni.

A building hi Mizopa chhiara chhawng 4 tura ruahman niin RCC hmanga sak tur a ni dawn a, Basement-ah Staff Room bakah NCC (Army leh Air Wing), IQAC Office, IGNOU leh RUSA bakah NSS Office te a awm ang a. Ground Floor-ah Principal Room, Establishment Room, Account Room, SU Office, Women Cell leh Adventure Club te bakah Staff Room thenkhat a awm leh ang a. First Floor leh Second Floor-ah Staff Room len Store te a awm dawn bawk a ni.