Chief Minister Lal Thanhawla chuan Zirtawpni khan Bawngkawn Brigade Area-ah Comprehensive Spastic Children Care Complex sakna tur lungphum a phum. Chief Minister chuan rualbanlo te hmakhua chu sawrkar pawhin ngaihtuahin, an puala sawrkar hna siam leh kawng dang dangah te hma lak sak thin a nih thu a sawi a. Zirtirtu qualification tha an neih loh avanga harsatna tawk an awm thin chu pawi a tih thu leh, chung harsatnate chu sutkian a nih theih nan sawrkar lama hmalak a nih tur thu a sawi a ni. Spastic Children Care Complex sakna tur hi Rs. nuai 774.17 a ni a, kum hnih chhunga sak tura ruahman niin March 2020 a sak zawh beisei a ni. He Complex hian ram 2941.63 metre bial a zau ah sak tur niin, a vaiin building unit pathum - Administrative Building (516.67 Sqm), Hostel Building (548.43 Sqm) leh School cum Assembly Hall Building (1429.81 Sqm) bakah 406.72 Sqm a zau Playground leh Tui Tanky 40 Sqm a lian awm tura ruahman a ni. Brilliant Consultancy, Chaltlang Dawrkawn chu he Complex sak hna hi an thawk a ni. Spastic Society of Mizoram hi kum 1989 a din tan niin rilru lama rualbanlo naupang tanpui hna an thawk thin a, Gilead Special School hi 1990 khan mimal In luaha din tan in, hmun hrang hranga an awm hnu in tuna Brigade Area ah hian anmahni hmun tur an nei ta a ni.