Aizawl: Chief Minister Lal Thanhawla chuan Mizote chu sum ngaina hnamah kan tlukluh a hlauh thu sawiin tan lakpui turin tlawmngai pawl leh kohhran a sawm. Nimin Lammuala India Independence day champha vawi 69-na, a hmanpui naah ah he thu hi sawiin Chief Minister chuan, “Kuttlingloa sum lakluh duhna avangin kan rama project lian hnathawh a chak thei lo a, a do turin kan zavaia tanrual a pawimawh a ni,” a ti. NLUP chungchang sawiin, “Rinawmna nen kan kalpui chuan a hlawhtling lo theilo ang,” a ti a. NLUP chu mi 90,139 hnenah pek a ni tawh tih sawiin mi dang 44,861 hnenah pek leh tum mek a nih thu a sawi a. Central, Mizoram sawrkar leh FAO nen technical cooperation lama inremna ziakin Rs. 3.15 Crore kan dawng tawh tiin Tata Trust nen pawh inremna ziakin NLUP hlawhtlinna turin Rs.18 Crore an rawn chhunglut tih a sawi bawk.